Ukraina Oliy Radasi “Rossiya Federatsiyasida mavjud siyosiy rejimni rashizm deb belgilash va uning mafkuraviy asoslari, ijtimoiy amaliyotini totalitar va insoniyatga qarshi qaratilgan, deb qoralash to‘g‘risida”gi bayonot loyihasini ro‘yxatdan o‘tkazdi, deb xabar bermoqda Meduza.
“Strana” nashrining qayd etishicha, loyiha mualliflari orasida hukmron “Xalq xizmatkori” partiyasi deputatlari ham bor, shuning uchun hujjat qabul qilinishi ehtimoli katta.
Tushuntirish xatida qarorning mantiqiy asosi sifatida quyidagilar aytiladi:
“Rossiya Federatsiyasining Ukrainaga qarshi shafqatsiz, asossiz urushi butun dunyoga V.Putin siyosiy rejimining neoimperial, o‘tmishdagi eng yomon amaliyotlarga taqlid qiluvchi, rus fashizmining zamonaviy varianti(rashizm)da fashizm va milliy sotsializm g‘oyalarini o‘zida mujassam etgan totalitar diktatura sifatidagi asl mohiyatini ochib berdi”.
Ushbu bayonot bilan Oliy Rada Vladimir Putinning “rashizm rejimi”ni qoralaydi va xalqaro hamjamiyatni Rossiyaning amaldagi siyosiy rejimini jinoyatchi deb tan olishga qo‘shilishga chaqiradi, deyiladi hujjatda.
Bayonot loyihasi ko‘rib chiqish uchun parlament qo‘mitasiga taqdim etildi. Qabul qilingandan so‘ng bayonot matni Birlashgan Millatlar tashkiloti, Yevroparlament, Yevropa Kengashi parlament assambleyasi, Yevropada xavfsizlik va hamkorlik tashkiloti, NATO parlament assambleyasi hamda xorijiy davlatlar hukumatlari va parlamentlariga taqdim etilishi rejalashtirilgan.
Izoh (0)