Qirg‘iziston Tashqi ishlar vazirligi fuqarolarga Tojikistonga har qanday sayohatdan vaqtincha voz kechishni tavsiya qildi. Bu haqda vazirlik manbalariga tayanib, 24.kg xabar berdi.
Ma’lum qilinishicha, Tojikiston hududiga rasmiy xabarnomasiz kirishni cheklashda davom etmoqda. Qirg‘izistonning Dushanbedagi elchixonasi xalqaro aeroportga yetib kelgan fuqarolarni Tojikiston chegarachilari mamlakatga kiritmagani haqida xabar berdi.
Shu bilan birga, aviachiptalarni sotib olish va tranzit zonasida qaytish parvozini kutish bilan bog‘liq qo‘shimcha moliyaviy xarajatlar yuzaga kelmoqda. Oxirgi marta bunday ogohlantirish Qirg‘iziston Tashqi ishlar vazirligi tomonidan 2022-yil 22-dekabrda e’lon qilingan.
2022-yil oktabr oyida ham qirg‘izistonliklardan Tojikistonga bormaslik so‘ralgandi. Bunga Tojikistonda Dushanbe xalqaro aeroportidagi nazorat-o‘tkazish punktida Qirg‘iziston fuqarolarining kirishi asossiz cheklanishi sabab bo‘lgan.
Tojikiston hududida qirg‘izlarning huquqlari buzilgan yoki ularga nisbatan noxolis qarashlar namoyon bo‘lgan taqdirda, Qirg‘iziston TIV Konsullik boshqarmasiga murojaat qilish so‘ralgan.
Ma’lumot o‘rnida, noyabr oyida Qirg‘izistonning chegaraga yaqin aholisiga vatan himoyasi uchun qurol ishlatishga ruxsat berilishi haqida xabar berilgan.
Izoh (0)