COVID-19 pandemiyasi 2023-yilda tugashi kutilmoqda. Bu haqda Jahon sog‘liqni saqlash tashkiloti (JSST) rahbari Tedros Adxanom Gebreyesus sog‘liqni saqlashga qo‘shgan hissasi uchun kichik-Tomas Frensis medali bilan taqdirlangan paytda ma’lum qildi.
Gebreyesusning ta’kidlashicha, vaziyat yaxshilanmoqda va infeksiyadan haftalik o‘limlar soni pandemiya ilk bor tan olgan 2020-yil boshiga qaraganda kamroq.
Shu bilan birga, u pandemiya butun insoniyat uchun saboq bo‘lishi kerakligini taʼkidladi. Gebreyesusning so‘zlariga ko‘ra, uchta asosiy xulosani chiqarish orqali odamlar yaqin kelajakda yuzaga kelishi mumkin bo‘lgan yangi pandemiya qiyinchiliklariga dosh bera oladi.
Xususan, u aholi salomatligi muhimligini unutmaslikka chaqirdi. U, shuningdek, qator kambag‘al davlatlar pandemiyaga qarshi boy mamlakatlarga qaraganda yaxshiroq kurashganini, chunki ularda sog‘liqni saqlash tizimi yaxshi yo‘lga qo‘yilganini ta’kidladi.
“Masalan, kasallanganlar bilan aloqani kuzatib borish kabi oddiy usulni olaylik. Ko‘pgina boy mamlakatlar buni unutib qo‘yishgan, dunyoning kambag‘alroq qismlarida esa turli infeksiyalar epidemiyasi bilan kurashish tajribasi tufayli bunday xotira saqlanib qolgan”, — deydi JSST rahbari.
Shuningdek, u ilm-fanning muhimligini ta’kidladi va zamonaviy bilimlar tufayli insoniyat kasallikka qarshi vaksinalarni ishlab chiqishga muvaffaq bo‘lganini eslatdi. Shuningdek, u ko‘plab mamlakatlar niqob taqish, karantin va emlash kabi elementar masalalarni siyosiylashtirganini, bu ilmiy qarashlarga zid ekanini ta’kidladi.
Nihoyat JSST rahbari mamlakatlarni hamkorligi muhimligini aytdi va ko‘plab davlatlar virusga qarshi kurashishda boshqalar bilan kuchlarni birlashtirishni istamayotganidan afsus bildirdi.
“Izchil va global javob o‘rniga, pandemiya tartibsiz javoblar aralashmasi bilan o‘tdi”, — dedi u.
Izoh (0)