Janubiy Afrikada Mozambik va Malavini qamrab olgan “Freddi” tropik bo‘roni yuzdan ortiq odamning hayotiga zomin bo‘ldi va katta vayronagarchiliklar keltirib chiqardi, deb yozmoqda Reuters.
O‘tgan hafta oxirida bo‘ron Mozambik davlatining markaziy qismiga kelib, uylarning tomini uchirib ketgan va suv toshqiniga sabab bo‘lgan, so‘ngra tabiiy ofat Malaviga tomon harakatlanib, mintaqani kuchli yomg‘ir ostida qoldirgan.
Mozambikning ayrim aholi punktlarida elektr energiyasi va aloqa uzilib qolgan. Shu sababli mamlakatda ko‘rilgan zarar va qurbonlar soni haqida aniq ma’lumotlar yo‘q.
Malavidagi yomon ob-havo tufayli kamida 99 kishi halok bo‘ldi. Bu haqda tabiiy ofat oqibatlarini bartaraf etish departamenti komissari Charlz Kalemba xabar qildi.
Butunjahon meteorologiya tashkiloti ma’lumotlariga ko‘ra, “Freddi” sikloni Janubiy yarimsharda qayd etilgan eng kuchli siklonlardan biri hisoblanadi.
Olimlarning ta’kidlashicha, tropik bo‘ronlar iqlim o‘zgarishi fonida kuchaymoqda, chunki issiqxona gazlari atmosferada issiqlikni ushlab turadi va okeanlar suvini isitadi. Issiq suv bug‘langanda, issiqlik energiyasi atmosferaga o‘tib, yanada kuchli siklon va bo‘ronlarni keltirib chiqaradi.
Izoh (0)