Vengriya Ukrainaga Yevropa askarlarining yuborilishi ssenariysidan ogohlantirdi

Ukrainada keskinlik xavfi doimiy ortib bormoqda, G‘arb davlatlari mojaroni mahalliy qolishini emas, balki uni umumiylashtirishga qaror qilgan. Bu haqda Vengriya mudofaa vaziri Krishtof Salay-Bobrovnitski Index nashriga bergan intervyusida ma’lum qildi.

U urush boshida G‘arb yetakchilarining tarixda yaxshilik va yomonlik tomonlari bor ulardan birini tanlash kerak, deganini eslatdi. Endi, deya davom etdi vazir, G‘arb davlatlari Rossiyaga qarshi sanksiyalar uchun ovoz berish, moliyaviy yordam ko‘rsatish va mudofaa xarajatlarini oshirishni boshlagan. Hozir Ukrainaga Leopard tanklari kelyapti, “qiruvchilar ham yo‘lda”.

“Agar ahvol shunday davom etsa, Ukrainaning inson resurslari tugaganda  yana askarlar kerak bo‘ladi. Bu ham o‘ziga xos eskalatsiya va oqibatda Yevropa urush epitsentrida paydo bo‘ladi”, — dedi Salay-Bobrovnitski.

Jurnalist unga Vengriya ham ukrainalik harbiy shifokorlarni tayyorlayotganini eslatib, bu ham harbiy yordammi, deb so‘radi. Vazir bunga javoban Vengriya hech qanday qurol yetkazib bermayotganini ta’kidladi va shunday tushuntirdi: “Bir tomondan, Ukraina hujumga uchragan davlat bo‘lsa, boshqa tomondan u bizning qo‘shnimiz. Bu bizning muammoga duch kelganlarga yordam berish uchun yaxshi qo‘shnichilik va ma’naviy burchimiz. Budapesht boshidanoq buni o‘z tarixidagi eng yirik gumanitar operatsiyaning bir qismi sifatida amalga oshirmoqda”.

Mart oyi o‘rtalarida Vengriya bosh vaziri Viktor Orban Yevropa qo‘shinlarini Ukrainaga yuborish ehtimoli haqida gapirgan edi. “Menimcha, Ukraina bilan ittifoqchi davlat askarlarini chegaradan o‘tkazib, Ukraina hududiga yuborish bo‘yicha jiddiy taklifga juda yaqin turibmiz”, — dedi u. Vengriya hukumati rahbarining fikricha, dunyo “mahalliy urushning jahon urushiga aylanishiga hech qachon bunchalik yaqin bo‘lmagan”.

Uning bu taxminlarini Italiya tashqi ishlar vaziri Antonio Tajani rad etdi. “Biz hech qachon Kiyevga qo‘shin yuborish haqida gaplashmaganmiz. Kuni kecha G7 vakillarining AQSH Davlat kotibi Entoni Blinken ishtirokida yig‘ilishi bo‘lib o‘tdi, unda qo‘shinlarni yuborish masalasi muhokama qilinmadi”, — deya tushuntirdi u.

AQSH, Germaniya va boshqa G‘arb davlatlari rasmiylari Ukrainaga qo‘shin yuborish imkoniyatini bir necha bor rad etib, bu Rossiya bilan to‘g‘ridan to‘g‘ri harbiy to‘qnashuvga olib kelishini ta’kidlagan.