Eron hukumati mamlakatda davom etayotgan norozilik namoyishlari tufayli hibsdagi 22 ming kishining afv etilishini e’lon qildi. Bu haqda Associated Press xabar bermoqda.
Eron sud tizimi rahbari G‘ulomhusayn Ejeyning so‘zlariga ko‘ra, namoyishlar bilan bog‘liq holda o‘g‘irlik yoki zo‘ravonlik jinoyatlarida ayblangan odamlar avf etilmaydi.
AP nashrining qayd etishicha, hozircha mahbuslarning haqiqatan ham ozod qilingani mustaqil tasdiqlanmagan. Eron ommaviy axborot vositalari va huquq faollari ham so‘nggi kunlarda qamoqxonalardan faollarning ommaviy chiqarilishi holatlari haqida xabar bergani yo‘q.
Eronda sentabr oyidan beri ommaviy norozilik namoyishlari davom etmoqda. Ularning boshlanishiga 22 yoshli Mahsa Aminiyning o‘limi sabab bo‘ldi — u hijobni “noto‘g‘ri” o‘ragani uchun politsiya o‘rinbosari tomonidan hibsga olinganidan ko‘p o‘tmay vafot etgan. Dastlab, namoyishchilar gender tenglik talab qilishdi, lekin ko‘p o‘tmay ularning talablari keng ko‘lamli islohotlar va rejim o‘zgarishini o‘z ichiga ola boshladi.
Eron hukumati norozilik namoyishlarini o‘ta shafqatsizlik bilan jumladan, harbiy qurollar yordamida bostirmoqda. O‘n minglab odamlar hibsga olingan; huquq himoyachilarining so‘zlariga ko‘ra, xavfsizlik kuchlari bilan to‘qnashuvlarda 450 dan ortiq namoyishchi halok bo‘lgan. Ayblovlar bo‘yicha yuzdan ortiq odam o‘limga hukm qilinishi mumkin.
Izoh (0)