Rossiya firmalari Markaziy Osiyodan kelgan yuzlab muhojirlarni bosib olingan Ukraina hududlariga ishlash uchun yollagan. Bu haqda Fokus.ua xabar berdi.
Muhojirlar rus askarlarining jasadlarini yig‘ish, xandaqlar qazish va jangovar harakatlar natijasida vayron bo‘lgan binolarni ta’mirlash bilan shug‘ullanadi. Markaziy Osiyo davlatlari hukumatlari o‘z fuqarolarini Ukrainaga bormaslik haqida bir necha bor ogohlantirgan, Ukraina esa ularni bosqinchilarning sheriklari deb bilishini ta’kidlagan.
Urmat ismli qirg‘izistonlik muhojir Rossiya kompaniyasi bilan shartnoma imzolaganini aytdi. Hujjat shartlariga ko‘ra, erkak halok bo‘lgan rus askarlarining jasadlarini yig‘ish uchun kuniga 120 dollar oladi. U bunday ish bilan bog‘liq xavf-xatarlardan xabardor ekanini aytgan va bu mavzuni boshqa qirg‘izistonlik muhojirlar bilan muhokama qilganini ta’kidlagan.
“Ular menga ba’zida o‘q ostida qolish va odamlar o‘ldirilishini aytdi. Ular umidsiz bo‘lgani uchun shu ishni qilmoqda, ba’zilarining qarzlari bor”, — dedi qirg‘iz muhojiri.
Mehnat muhojirlarining aksariyati harbiy harakatlar natijasida vayron bo‘lgan shaharlarda, xususan, Mariupoldagi qurilish maydonlarida ishlaydi. Ukrainaga ishlash uchun ayollar ham boradi. Ularga sharqda bosib olingan hududlardagi harbiy gospitallar, oshxonalar va fabrikalarda ishlash taklif qilingan.
Jurnalistlarning aniqlashicha, migrantlar uchun asosiy rag‘bat puldir. Ularga oyiga 2000 dollardan 3300 dollargacha bo‘lgan maosh taklif etiladi, bu Rossiyada ishchilar olishi mumkin oylikdan bo‘lganidan ancha yuqori. Ba’zi ishchilar 700 dan 1200 dollargacha pul topadi.
Tojikistonlik Sorbon ismli shaxsning aytishicha, Ukrainada ishlash haqida saytlar, Telegram guruhlari va boshqa ijtimoiy tarmoqlarda reklama qilinmoqda. Shuningdek, ular bo‘sh ish o‘rinlari haqida ish beruvchilari orqali bilib oladi.
Izoh (0)