O‘zbekistonda 2023-yilning fevralida davlat budjet daromadlari 16,1 trln so‘mni tashkil qildi (.pdf)
Bu ko‘rsatkich 2022-yilning mos davriga nisbatan 2,4 trln so‘mga yoki 17,7 foizga oshdi degani.
Joriy yilning fevralida davlat budjeti daromadlarida soliq organlari ma’murchiligidagi tushumlar 13,4 trln so‘mni tashkil qildi. Bojxona organlari bo‘yicha tushumlar 3,8 trln so‘m bo‘ldi.
QQS stavkasining 15 dan 12 foizga pasaytirilishi kutilganidek budjet tushumlari bilan birgalikda QQS “manfiy qoldiq” summasining budjetdan qoplab beriladigan qismiga ham ta’sir ko‘rsatdi.
2023-yil fevral oyida QQS jami tushumlari 5,8 trln so‘mni tashkil etib, o‘tgan yilning mos davriga nisbatan 6,6 foizga oshdi.
Soliq organlari tomonidan joriy yilning fevral oyida 2,8 trln so‘m miqdordagi QQS tushumlari tushishi ta’minlandi (2022 yil fevral oyiga nisbatan 10 foizga ko‘p).
Bojxona organlari tomonidan joriy yilning fevral oyida 3 trln so‘m yoki 2022 yilning mos davriga nisbatan 3,7 foizga ko‘proq QQS undirildi.
Bevosita soliqlar bo‘yicha joriy yil fevral oyi tushumlari 6,4 trln so‘mni tashkil etib, oldingi oyga nisbatan 2 trln so‘mga (46,1 foiz), 2022-yilning mos davriga nisbatan esa 1 trln so‘mga (19,2 foiz) oshdi.
Daromad solig‘i bo‘yicha joriy yil fevral oyi tushumlari 3,9 trln so‘mni tashkil etib, yanvar oyiga nisbatan 1,5 trln so‘mga (61,4 foiz), 2022-yil fevral oyiga nisbatan esa 0,5 trln so‘mga (14,8 foiz) oshdi.
Tushumlarning asosiy qismi Navoiy hamda Olmaliq KMKga to‘g‘ri keladi (2023 yil fevralda – 47,3 foiz, 2022-yil fevralda esa – 49,7 foiz).
Ta’kidlanishicha, yirik soliq to‘lovchilar toifasiga kirmaydigan tadbirkorlik subyektlari iqtisodiy faolligining oshishi davom etmoqda.
Ularning tushumlari joriy yilning fevral oyida yanvar oyiga nisbatan qariyb 2 barobarga, 2022-yil mos davriga nisbatan esa 1,4 barobarga oshdi.
Joriy yil fevral oyi foyda solig‘i tushumlarining yanvar oyiga nisbatan o‘sishi, yillik soliq hisobot taqdim qilish muddatlaridagi yakuniy foyda solig‘i to‘lovlari hisobiga ta’minlandi
Izoh (0)