Qirg‘iziston Markaziy Osiyoda piyoz eksportiga qo‘yilgan taqiqni muddatidan oldin bekor qilgan birinchi davlat bo‘ldi. Bu haqda EastFruit xabar bermoqda.
Ekspertlarning taʼkidlashicha, joriy yilning yanvar oyi oxirida ushbu mamlakat hukumati tomonidan tadbiq qilingan piyoz eksportiga vaqtinchalik cheklov kutilgan uch oy o‘rniga bir oydan sal ko‘proq vaqt davomida amal qildi.
Qirg‘iziston Qishloq xo‘jaligi vazirligi 3-martdan boshlab piyoz eksportiga qo‘yilgan vaqtinchalik cheklov bekor qilingani haqida ma’lum qilgan.
Qozog‘iston, O‘zbekiston va Tojikistondan so‘ng 2023-yil yanvar oyi oxirida Qirg‘iziston ham 2023-yilning 31-yanvaridan 30-apreligacha piyoz eksportiga vaqtinchalik cheklov joriy qilgan edi.
Bunday choraning qabul qilinishi oziq-ovqat xavfsizligini ta’minlash va ijtimoiy ahamiyatga ega oziq-ovqat mahsulotlari, shuningdek, piyozning barcha turlarini o‘z ichiga olgan narxlarni ushlab turish zarurligi bilan izohlandi.
Biroq, 2023-yil fevral oyining ikkinchi yarmida mamlakat hukumati piyoz eksportiga o‘rnatilgan cheklovni olib tashlashga tayyorgarlik ko‘rishni boshladi.
“Qishloq xo‘jaligi boshqarmasi Qirg‘izistonda piyoz yetishtiruvchi fuqarolar va tashkilotlarning talablarini qondirdi. Ularning fikricha, mamlakatda ichki bozordagi talabni qondirish uchun yetarli mahsulotlar mavjud.
Bugungi kunda Qirg‘iziston aholisining piyozga bo‘lgan ehtiyoji oyiga 6 ming tonnani tashkil etadi. Ayni paytda fermerlarda 50 ming tonnaga yaqin zahira mavjud, bu esa, o‘z navbatida, aholining 2-2,5 oylik ehtiyojini qoplaydi”, — deb yozadi “Ekonomist.kg”.
Shunday qilib, 2023-yil yanvar oyi oxirida joriy etilgan Qirg‘izistondan piyoz ekspor qilishni taqiqlash amalda, 2023-yilning 31-yanvaridan 3-martigacha amal qilgan. Bu esa atigi 32 kun degani.
Qirg‘iziston Markaziy Osiyoda birinchilardan bo‘lib piyoz eksportiga qo‘yilgan vaqtinchalik cheklovni muddatidan oldin bekor qildi.
Avvalroq Qozog‘istonda fermerlar hukumatni piyoz eksportiga taqiqni bekor qilishga chaqirayotgani haqida xabar berilgan edi.
Izoh (0)