Qozog‘iston fermerlari hukumatdan ichki bozor uchun zarur bo‘lgan piyoz miqdorini hisoblab chiqib, ortiqchasini eksport qilishga ruxsat berishni talab qilmoqda. Bu haqda Forbes xabar berdi.
Dehqonlar ichki bozorda piyoz yetarli, ortiqchasi esa chiriyotganidan xavotirda. Muammoni hal qilish uchun Olmaota, Turkiston va Jambil viloyat fermerlari “Atameken” milliy tadbirkorlar palatasiga murojaat qilgan.
“Oltay” mas’uliyati cheklangan jamiyati rahbari Nurlan Nurbekovning aytishicha, bahorgi ekish mavsumi yaqinlashib qolgan, biroq o‘tgan yilgi hosil hali sotilmagani uchun urug‘ olishga mablag‘ yo‘q. Bundan tashqari, piyoz tez buziladigan mahsulotdir — agar u chirib qolsa, yo‘qotishlarni hech kim qoplab bermaydi.
“Ayni damda sotuvchilarga 1 kilogrammi 150 tangadan yetkazib berishimiz kerak bo‘lgan piyoz 1 kilogrammi kamida 300 tangadan sotilmoqda.
Natijada, sotuvchilar (hatto logistika xarajatlarini chegirib tashlaganlaridan keyin ham) 1 kg uchun 120-130 tenge foyda ko‘rmoqda. Ishlab chiqaruvchi esa keyingi mavsum uchun urug‘ ekish va sotib olish uchun mablag‘ qoldirishga qodir emas, — deydi fermer.
Tadbirkorlarning fikricha, qishloq xo‘jaligi ishlab chiqarish kooperativi faoliyati aslida yirik chakana savdo korxonalari manfaatlariga qaratilgan. Bozorga mahsulot yetkazib berish va narxlarni ushlab turish yuki esa faqat ishlab chiqaruvchilar zimmasiga tushadi.
Sharoit yaratib berilmasa, fermerlar kelajakda piyoz yetishtirmasligi ham mumkin. Bu aholi uchun ijtimoiy ahamiyatga ega mahsulot ekanligini hisobga olsak, bozor tahdid ostida, — deyiladi xabarda.
2023-yilning 28-yanvarida mamlakat Qishloq xo‘jaligi vazirligining piyoz eksportini taqiqlash to‘g‘risidagi buyrug‘i kuchga kirdi. Taqiq uch oyga joriy etilgan.
Izoh (0)