Saudiya Arabistoni suveren jamg‘armasi mamlakatning yangi milliy aviakompaniyasi foydalanishi uchun Boeing samolyotlarining katta partiyasini sotib olish bo‘yicha kelishuvni yopishga yaqin turibdi. Bu haqda The Wall Street Journal (WSJ) manbalarga tayanib xabar berdi.
Ma’lum bo‘lishicha, umumiy buyurtma 35 milliard dollarni tashkil etadi va samolyotlar soni 100 ta yoki undan ko‘p bo‘lishi mumkin.
WSJ manbalariga ko‘ra, yaqin kunlarda ushbu kelishuv haqida rasman e’lon qilinishi mumkin va bu samolyotlar mo‘ljallangan yangi milliy aviakompaniya taqdimotiga to‘g‘ri keladi.
Buyurtma qilingan samolyotlar orasida keng fyuzelyajli modellar bo‘ladi, ular ko‘proq uzoq masofalarga parvozlar uchun mo‘ljallangan.
Saudiya hukumati 2021-yilda yangi aviakompaniya yaratish rejalarini e’lon qildi. Uning ishga tushirilishi asosan neft qazib olishga tayanadigan mamlakat iqtisodiyotini diversifikatsiya qilish dasturining bir qismidir.
Saudiya rasmiylarining hisob-kitoblariga ko‘ra, ikkinchi milliy aviatashuvchining tashkil etilishi mamlakatning global biznes markaziga aylanishi va mintaqadagi boshqa aviakompaniyalar bilan raqobatlashishiga yordam beradi.
Izoh (0)