O‘zbekiston va Turkmaniston avtomobil transportida xalqaro yuk tashuvlarini amalga oshirishda yangicha tizimga o‘tishi kutilmoqda. Bu haqda Transport vazirligi axborot xizmati xabar berdi.
Xabarga ko‘ra, 10-mart kuni Turkmanistonning Ashxobod shahrida transport vaziri Ilhom Mahkamov Turkmaniston Vazirlar Mahkamasi huzuridagi transport va kommunikatsiyalar agentligi raisi Mammetxan Chakiyev bilan uchrashdi. Uchrashuvda transport sohasidagi hamkorlik aloqalarini rivojlantirish istiqbollari muhokama etildi. Xususan, tomonlar yuk tashuvlari jarayonida vujudga kelayotgan ayrim qiyinchiliklarni bartaraf etish orqali transport-tranzit aloqalarini kengaytirish yuzasidan fikr almashdi.
Shuningdek, yuk tashuvlari jarayonini jadallashtirish maqsadida chegara operatsiyalarini osonlashtirish va tezlashtirish uchun tarif va bojlarni unifikatsiya qilish va uyg‘unlashtirish masalalari ko‘rib chiqildi.
Xususan, o‘zbek tomoni avtomobil transportida xalqaro yuk tashuvlarini amalga oshirishda ruxsatnoma blankalarini elektron tarzda almashishni nazarda tutuvchi E-Permit raqamli tizimiga o‘tish taklifini bildirdi. Muzokaralar davomida O‘zbekiston–Turkmaniston–Eron transport yo‘lagini rivojlantirish bilan bog‘liq jihatlar ham ko‘rib chiqildi.
Uchrashuv ishtirokchilari yangi transport-tranzit yo‘laklarini rivojlantirish masalalarini muhokama qilishni davom ettirishga kelishib oldi, shuningdek, ikki tomonlama hamkorlikni takomillashtirish va kengaytirishning keyingi bosqichlarini belgilab oldi.
Avvalroq O‘zbekistonlik haydovchilarga Turkmaniston vizasini berish tartibi soddalashtirilishi xabar qilingandi.
Izoh (0)