Ўзбекистон ва Туркманистон автомобиль транспортида халқаро юк ташувларини амалга оширишда янгича тизимга ўтиши кутилмоқда. Бу ҳақда Транспорт вазирлиги ахборот хизмати хабар берди.
Хабарга кўра, 10 март куни Туркманистоннинг Ашхобод шаҳрида транспорт вазири Илҳом Маҳкамов Туркманистон Вазирлар Маҳкамаси ҳузуридаги транспорт ва коммуникациялар агентлиги раиси Мамметхан Чакиев билан учрашди. Учрашувда транспорт соҳасидаги ҳамкорлик алоқаларини ривожлантириш истиқболлари муҳокама этилди. Хусусан, томонлар юк ташувлари жараёнида вужудга келаётган айрим қийинчиликларни бартараф этиш орқали транспорт-транзит алоқаларини кенгайтириш юзасидан фикр алмашди.
Шунингдек, юк ташувлари жараёнини жадаллаштириш мақсадида чегара операцияларини осонлаштириш ва тезлаштириш учун тариф ва божларни унификация қилиш ва уйғунлаштириш масалалари кўриб чиқилди.
Хусусан, ўзбек томони автомобиль транспортида халқаро юк ташувларини амалга оширишда рухсатнома бланкаларини электрон тарзда алмашишни назарда тутувчи Э-Пермит рақамли тизимига ўтиш таклифини билдирди. Музокаралар давомида Ўзбекистон–Туркманистон–Эрон транспорт йўлагини ривожлантириш билан боғлиқ жиҳатлар ҳам кўриб чиқилди.
Учрашув иштирокчилари янги транспорт-транзит йўлакларини ривожлантириш масалаларини муҳокама қилишни давом эттиришга келишиб олди, шунингдек, икки томонлама ҳамкорликни такомиллаштириш ва кенгайтиришнинг кейинги босқичларини белгилаб олди.
Аввалроқ Ўзбекистонлик ҳайдовчиларга Туркманистон визасини бериш тартиби соддалаштирилиши хабар қилинганди.
Изоҳ (0)