Bahodir Sidiqov “O‘zbekneftgaz” AJ boshqaruvi raisi lavozimiga tayinlandi, deb xabar bermoqda “Yangi O‘zbekiston” nashri.
Tayinlovga qadar u Olmaliq kon-metallurgiya kombinati Yoshlik konini o‘zlashtirish bo‘yicha loyiha ofisi rahbari lavozimida ishlab kelgan. Shuningdek, 2019—2020-yillarda “O‘zbekneftgaz”ga rahbarlik qilgan. Undan avval Vazirlar Mahkamasi Geologiya, yoqilg‘i-energetika kompleksi, kimyo, neft-kimyo va metallurgiya sanoati masalalari axborot-tahlil departamentining mudiri lavozimida faoliyat yuritgan.
2020-yilning yanvaridan “O‘zbekneftgaz” boshqaruvi raisi bo‘lgan Mehriddin Abdullayevning yangi lavozimi haqida ma’lumot keltirilmagan.
Eslatib o‘tamiz, 2022-yilning 15-dekabrida o‘tkazilgan videoselektor yig‘ilishida Shavkat Mirziyoyev aholini qiynayotgan energiya ta’minoti masalasiga to‘xtalib, zarur choralarni ko‘rmagani uchun yetti nafar rahbar qatorida Mehriddin Abdullayevga ham hayfsan bergandi.
2023-yilning 16 yanvarida prezident raisligida o‘tgan navbatdagi selektor yig‘ilishida Mehriddin Abdullayev lavozimidan ozod etilib, unga vazifasini bajaruvchi lavozimida 3 oy sinov muddati belgilangandi.
Izoh (0)