“Daryo” reportaji: Obodonlashtirish xodimalariga uzuk, ayol haydovchilarga gul va yo‘lovchi xonimlar uchun bepul qatnov (video)

Namanganda yakuniga yetayotgan joriy yilgi Xalqaro xotin-qizlar kuni kutilmagan syurprizlarga boy bo‘ldi. Bu haqda “Daryo” muxbiri Azizbek Abduvaliyev xabar bermoqda.

Namangan shahridagi tilla do‘konlaridan birining egasi jurnalist Rayhona Erkinovaga bir qancha tilla va kumush uzuklar berib, ularni ehtiyojmand ayollarga sovg‘a qilishni so‘ragan. Jurnalist ularni bayram arafasida Mingbuloq, Norin, Uchqo‘rg‘on tumanlari va Namangan shahridagi obodonlashtirish boshqarmalarining ko‘cha supuruvchi ayollariga taqdim etdi. Ular esa kutilmagan hadyadan mamnun bo‘lib, o‘zini tanitishni istamagan homiyni duo qiladi.

 
Rayhona Erkinovaning aytishicha, tadbirkor ushbu aksiyadan so‘ng do‘konida tushum miqdori salkam ikki barobar ko‘payganini bildirgan va bundan keyin reklama uchun sarflaydigan mablag‘ini xayriya tadbirlariga ishlatishga qaror qilgan.

Viloyat yo‘l harakati xavfsizligi xodimlari esa bayram arafasida anʼanaga muvofiq ayol haydovchilarni to‘xtatib, bayram bilan bilan tabriklashdi. Ularga gullar va shirinliklar hadya etildi.

Erkak haydovchilar ham YHXB xodimlaridan qolishmaslikka harakat qilishdi. Bayram kuni Namangandagi yo‘lovchi tashish bilan shug‘ullanuvchi aksariyat mashinalarda “Ayollar uchun bepul” degan yozuvni ko‘rish mumkin edi.