O‘zbekiston Tashqi ishlar vazirligi xorijda qiyin ahvolda qolgan 462 nafar fuqaroga yordam ko‘rsatdi. Bu haqda vazirlik matbuot kotibi Ahror Burxonov ma’lum qildi.
Qayd etilishicha, 2023-yilning yanvar—fevral oylarida chet elda moddiy jihatdan qiyin ahvolda qolgan 462 nafar fuqaroga qariyb 57 ming AQSH dollari miqdorida yordam ko‘rsatilgan.
Konsullik-huquqiy faoliyat doirasida esa chet eldagi O‘zbekiston fuqarolarining qonuniy haq-huquqlarini va manfaatlarini himoya qilish, xorijdagi vatandoshlar bilan muloqotni mustahkamlashga ustuvor ahamiyat qaratilgan.
O‘tgan ikki oy davomida:
- o‘ttiz ikki mingdan ziyod O‘zbekiston fuqarosiga konsullik xizmatlari ko‘rsatilgan.
- 794 nafar hamyurtimizni chet elda ish bilan ta’minlashga ko‘maklashilgan.
Bundan tashqari, favqulodda vaziyatlar, tabiiy ofatlar, murakkab epidemiologik holatlar va texnogen hodisalar oqibatida zarar ko‘rgan 10 mingga yaqin fuqaromizga 108 ming AQSH dollaridan ziyod ko‘mak ko‘rsatilgan. Bunda yordamning katta qismi Turkiyada ro‘y bergan zilzila oqibatida jabr ko‘rgan fuqarolarga ko‘rsatilgan.
Izoh (0)