Toshkent shahrida tez yordam mashinasi haydovchisining kaltaklanishiga oid yangi ma’lumotlar paydo bo‘ldi. Tomonlar voqea bo‘yicha o‘z variantlarini aytib bergan, biroq ularning ko‘rsatmalari bir-biridan keskin farq qilmoqda.
27-fevral kuni Sergeli tumanida tez yordam haydovchisining kaltaklangani to‘g‘risida xabar berilgandi. Jabrlanuvchi bosh miya yopiq jarohati, miya chayqalishi, burun suyagining sinishi, burun yumshoq to‘qimalarining lat yeyishi dastlabki tashxisi bilan neyroxirurgiya bo‘limiga yotqizilgan edi.
Tergov davomida haydovchi ko‘rsatma bergan. Jabrlanuvchining so‘zlariga ko‘ra, uning brigadasi murojaat kelib tushganidan 5 daqiqa o‘tib, bemor xonadoniga yetib borgan.
Uni kaltaklagan erkakning bayonoti esa boshqacha. Er-xotinning aytishicha, tez yordam mashinasi murojaatdan 40 daqiqa o‘tib yetib kelgan. Bundan tashqari, feldsher va shifokor 43 yoshli bemorning oldiga kelib, uni ko‘zdan kechirmagan, balki xona ostonasida turib tashxis qo‘ygan — intoksikatsiya (zaharlanish) — va uni shifoxonaga olib ketish taklifini bildirgan.
Bu esa mast holatdagi 33 yoshli erkakning jahlini chiqargan. U tez yordam xodimlarini haqorat qilishni boshlagan, bundan qo‘rqib ketgan shifokor kvartirani tark etgan. O‘z navbatida feldsher bemorni ko‘zdan kechirgan, uning qon bosimini o‘lchagan va ukol qilgan.
Ammo bu ham kvartira egasini tinchlantirmagan. U pastga tushib, tez yordam mashinasining 53 yoshli haydovchisi bilan yoqalashgan. Janjalga sabab bo‘lgan erkakning qo‘shimcha qilishicha, u hovuridan bosilgach, shu kuni uyiga kelgan tez yordam brigadasidan kechirim so‘rashga ulgurgan.
Ertasi kuni Toshkent shahar IIBB va Sog‘liqni saqlash vazirligi holat yuzasidan ma’lumot bergandi. O‘shanda tunggi 03:25 da tez yordamni chaqirgan ayol kaltaklanish oqibatida jiddiy jarohat olgani ma’lum qilingan edi. Unga zudlik bilan kerakli tibbiy yordam ko‘rsatilgan.
Holat bo‘yicha Jinoyat kodeksining 277-moddasi (bezorilik) bilan jinoyat ishi qo‘zg‘atilgan. Hozirda tergov harakatlari davom ettirilmoqda.
Izoh (0)