Тошкент шаҳрида тез ёрдам машинаси ҳайдовчисининг калтакланишига оид янги маълумотлар пайдо бўлди. Томонлар воқеа бўйича ўз вариантларини айтиб берган, бироқ уларнинг кўрсатмалари бир-биридан кескин фарқ қилмоқда.
27 февраль куни Сергели туманида тез ёрдам ҳайдовчисининг калтаклангани тўғрисида хабар берилганди. Жабрланувчи бош мия ёпиқ жароҳати, мия чайқалиши, бурун суягининг синиши, бурун юмшоқ тўқималарининг лат ейиши дастлабки ташхиси билан нейрохирургия бўлимига ётқизилган эди.
Тергов давомида ҳайдовчи кўрсатма берган. Жабрланувчининг сўзларига кўра, унинг бригадаси мурожаат келиб тушганидан 5 дақиқа ўтиб, бемор хонадонига етиб борган.
Уни калтаклаган эркакнинг баёноти эса бошқача. Эр-хотиннинг айтишича, тез ёрдам машинаси мурожаатдан 40 дақиқа ўтиб етиб келган. Бундан ташқари, фелдшер ва шифокор 43 ёшли беморнинг олдига келиб, уни кўздан кечирмаган, балки хона остонасида туриб ташхис қўйган — интоксикация (заҳарланиш) — ва уни шифохонага олиб кетиш таклифини билдирган.
Бу эса маст ҳолатдаги 33 ёшли эркакнинг жаҳлини чиқарган. У тез ёрдам ходимларини ҳақорат қилишни бошлаган, бундан қўрқиб кетган шифокор квартирани тарк этган. Ўз навбатида фелдшер беморни кўздан кечирган, унинг қон босимини ўлчаган ва укол қилган.
Аммо бу ҳам квартира эгасини тинчлантирмаган. У пастга тушиб, тез ёрдам машинасининг 53 ёшли ҳайдовчиси билан ёқалашган. Жанжалга сабаб бўлган эркакнинг қўшимча қилишича, у ҳовуридан босилгач, шу куни уйига келган тез ёрдам бригадасидан кечирим сўрашга улгурган.
Эртаси куни Тошкент шаҳар ИИББ ва Соғлиқни сақлаш вазирлиги ҳолат юзасидан маълумот берганди. Ўшанда тунгги 03:25 да тез ёрдамни чақирган аёл калтакланиш оқибатида жиддий жароҳат олгани маълум қилинган эди. Унга зудлик билан керакли тиббий ёрдам кўрсатилган.
Ҳолат бўйича Жиноят кодексининг 277-моддаси (безорилик) билан жиноят иши қўзғатилган. Ҳозирда тергов ҳаракатлари давом эттирилмоқда.
Изоҳ (0)