Toshkentning Yashnobod tumanida og‘ir ahvolda shifoxonaga olib kelingach vafot etgan bemorning farzandlari tez tibbiy yordam xodimlarini kaltaklagani haqida xabar berilgan edi. Toshkent shahar IIBB matbuot xizmati tibbiyot xodimlarini kaltaklagan shaxslarga nisbatan jinoyat ishi qo‘zg‘atilganini ma’lum qildi.
Poytaxt IIBB ma’lumotlariga ko‘ra, 18-fevral kuni soat 23:50 larda Yakkasaroy tumanidagi, I.Irgashev nomidagi 4-sonli shahar klinik shifoxonasidagi izolyator xonasida 28 yoshli F.M. shaxsi aniqlashtirilayotgan ikki nafar tanishlari bilan qo‘l va oyoqlari yordamida tez tibbiy yordam bo‘limi 3-sonli podstansiya shifokori 31 yoshli D.U. va feldsher 20 yoshli A.A.ga tan jarohati yetkazgan.
“Sodir etilgan jinoyatning sababi o‘rganilganda, F.M. shifokorlarning o‘z ishiga sovuqqonlik bilan yondashganligi sababli onasi D.N.ning o‘limi yuz bergan degan fikrda bo‘lganligi aniqlangan. Marhum D.N. yuqorida qayd etilgan kasalxonaga tez tibbiy yordam mashinasida klinik o‘lim holatida olib kelingan”, — deyiladi xabarda.
Voqea oqibatida ikkala tibbiyot xodimi turli darajadagi tan jarohatlari olgan. SSV matbuot xizmati 20-fevralda jabrlangan tibbiyot xodimlarining ahvoli og‘irligicha qolgani va ularga maxsus jarrohlik amaliyotiga tibbiy ko‘rsatma borligi sababli Respublika shoshilinch tibbiy yordam ilmiy markaziga o‘tkazilganini ma’lum qilgandi.
Holat yuzasidan Jinoyat kodeksining 277-moddasi (bezorilik) alomatlari bilan jinoyat ishi qo‘zg‘atilgan. Tergov davom etmoqda.
Bundan avval Jizzaxda tibbiyot xodimi kaltaklangani, Sirdaryoda 6 nafar mast fuqaro tez yordam xodimlarini kaltaklagani hamda Farg‘onada tez yordam xodimlarini kaltaklagan shaxs qamoqqa olingani haqida xabar berilgan edi.
Izoh (0)