Farg‘ona viloyatining Rishton tumanidagi xonadonlarning biriga chaqiruv asosida borgan tez yordam shifokori bemorning yaqinlari tomonidan kaltaklandi, deya xabar berdi “Daryo” muxbiri.
2022-yilning 12-noyabr kuni soat 04:08 da Rishton tumanining “Oqtom” mahallasida yashovchi fuqarodan tez yordamga chaqiruv kelib tushgan. Tez tibbiy yordam shifokorlari brigadasi chaqiruv asosida belgilangan manzilga yetib borgan va bemorga birinchi yordam ko‘rsatgan.
Shundan so‘ng, bemorning ahvoli og‘irligi uchun tez yordam mashinasida tuman tibbiyot birlashmasining qabul diagnostika bo‘limiga olib kelingan. Ko‘rsatilgan tibbiy muolajalarga qaramasdan bemor shifoxonada vafot etgan.
Bu holatdan asabiylashgan bemorning yaqinlari va 54 yoshli tez yordam shifokori B.Z. o‘rtasida kelishmovchilik kelib chiqqan. Oqibatda bemorning yaqinlari shifokorni kaltaklagan.
Olgan jarohatlari natijasida shifokor Rishton tumani tibbiyot birlashmasi shoshilinch tez tibbiy yordam travmatologiya bo‘limiga bosh miya yopiq jarohati, bosh miya chayqalishi, o‘ng qosh sohasi yirtilgan jarohati, ko‘z olmasi kontuziyasi tashxisi bilan yotqizilgan. Ayni paytda davo muolajalari davom ettirilmoqda.
“Daryo” muxbiri mazkur voqea tafsilotlarini o‘rganmoqda.
Mavzuga doir:
Izoh (0)