Tabiat resurslari vazirligi tasarrufidagi “Surxon” davlat qo‘riqxonasi xodimlari noyob jonivor bo‘lgan morxo‘rning noqonuniy ovlanishi bilan bog‘liq holatni fosh etdi. Bu haqda vazirlik axborot xizmati xabar berdi.
Xabarga ko‘ra, 4-mart kuni soat 10:00 larda qo‘riqxonaning asosiy maydoniga 3 nafar shaxsi nomaʼlum fuqaro noqonuniy ravishda kirgani aniqlandi. Holat yuzasidan qo‘riqxona bosh mutaxassisi, qo‘riqlash xodimlaridan iborat tezkor reyd guruhi tuzilib, qo‘riqxona hududida kuzatuv ishlari olib borildi.
Kuzatuv ishlari davomida qo‘riqxonaga yaqin hududda harakatlanib ketayotgan Nexia-2 xodimlarda shubha uyg‘otgan. “Vandob” mahallasida yashovchi fuqaro X.B.ga tegishli bo‘lgan ushbu avtomashina to‘xtatilib, yukxonasi ko‘zdan kechirilganda bir bosh burama shoxli echki (morxo‘r)ning go‘shti bo‘laklangan holda olib ketilayotgani aniqlandi.
Surishtiruv ishlari davomida Sherobod tumanining “Vandob” mahallasida yashovchi fuqaro Sh.A. va Angor tumanida yashovchi fuqaro I.O‘. qonunga xilof ravishda qo‘riqxonaning Vandob bo‘limi Darayg‘ulsoy massividan ovchilik ruxsatnomasi bo‘lmagan IJ-17-32 kalibrli bir stvolli ov miltig‘i va 1 dona pnevmatik qurol bilan O‘zbekiston Qizil kitobiga kiritilgan 1 bosh morxo‘rni otib nobud qilgani maʼlum bo‘ldi.
Aniqlangan holat bo‘yicha “Surxon” davlat qo‘riqxonasi, viloyat IIB, tuman IIB xodimlari va xolis guvohlar ishtirokida dalolatnoma rasmiylashtirildi hamda huquqbuzarlarga tegishli bo‘lgan ov qurollari va fuqaro X.B.ga tegishli avtomashina tuman IIB xodimlariga topshirildi.
Shuningdek, huquqbuzarlardan ovlangan morxo‘r go‘shti hamda 8 dona otilmagan va 4 dona ishlatilgan – jami 11 dona ov miltig‘i o‘qlari qonuniy to‘xtamga kelgunga qadar xolis guvohlar ishtirokida bayonnoma rasmiylashtirilib, ashyoviy dalil sifatida olindi.
Noqonuniy ovchilarning yovvoyi hayvonot dunyosiga keltirgan zarari Vazirlar Mahkamasining 2014-yil 20-oktabrdagi qarorining 2-ilovasi bilan tasdiqlangan nizomning 14-ilovasiga asosan 180 000 000 so‘mni tashkil etdi.
Aniqlangan holat yuzasidan birlamchi hujjatlar rasmiylashtirilib, Surxondaryo viloyat prokuraturasiga taqdim etish uchun tayyorlanmoqda.
Izoh (0)