O‘zbekiston va Turkiya o‘rtasida yangi yo‘nalishda aviqatnovlar yo‘lga qo‘yiladi

O‘zbekiston va Turkiya o‘rtasida reyslar soni ko‘paytirilib, yangi yo‘nalishda aviqatnovlar yo‘lga qo‘yiladi. Bu haqda Investitsiyalar, sanoat va savdo vazirligi axborot xizmati xabar berdi. 

Xabarga ko‘ra, 7-mart kuni investitsiyalar, sanoat va savdo vaziri Laziz Kudratov Turkiyaning O‘zbekistondagi favqulodda va muxtor elchisi Olgan Bekar bilan uchrashdi. Muloqot avvalida O‘zbekiston tomoni fevral oyida Turkiyaning janubi-sharqiy hududlarida sodir bo‘lgan kuchli zilzila oqibatida ko‘plab insonlar halok bo‘lgani va infratuzilmaga jiddiy zarar yetkazilgani munosabati bilan chuqur hamdardlik bildirdi. O‘z navbatida turkiyalik diplomat tabiiy ofat oqibatlarini bartaraf etishda yordam ko‘rsatish maqsadida Turkiyaning tabiiy ofatdan jabr ko‘rgan hududlariga qutqaruvchilarni va katta hajmdagi insonparvarlik yordami yuborgani uchun O‘zbekiston rahbariyatiga alohida minnatdorlik bildirdi.

Shuningdek, o‘zaro savdo va sarmoyaviy hamkorlik hajmini oshirish istiqbollari muhokama qilindi. O‘zbekiston bilan Turkiya o‘rtasidagi o‘zaro tovar ayirboshlash ko‘rsatkichlari so‘nggi uch yilda bir yarim barobar, investitsiyalar hajmi esa ikki barobar oshgani taʼkidlandi. Tomonlar ana shunday ijobiy dinamikani saqlab qolish maqsadida faol hamkorlikni davom ettirish niyatida ekanliklarini tasdiqladi.

O‘zbekiston va Turkiya o‘rtasidagi transport va logistika sohasidagi aloqalarni kengaytirish va yo‘laklarni diversifikatsiya qilish intensivligiga yuqori baho berildi. Shu nuqtai nazardan, 2023- yilda ikki mamlakat hududlari o‘rtasida reyslar sonini ko‘paytirish va yangi yo‘nalishlardagi aviaqatnovlarni yo‘lga qo‘yish bo‘yicha aniq chora-tadbirlar kelishib olindi.

Bundan tashqari, tomonlar 2023-yilning ikkinchi yarmida Savdo-iqtisodiy hamkorlik bo‘yicha O‘zbekiston-Turkiya Hukumatlararo komissiyasining navbatdagi yig‘ilishini o‘tkazishning tashkiliy masalalarini ko‘rib chiqdi. Bo‘lajak tadbir kun tartibini istiqbolli shartnoma va kelishuvlar bilan boyitish uchun tegishli vazirlik va idoralarning o‘zaro hamkorligini faollashtirish bo‘yicha kelishuvga erishildi.