Табиат ресурслари вазирлиги тасарруфидаги “Сурхон” давлат қўриқхонаси ходимлари ноёб жонивор бўлган морхўрнинг ноқонуний овланиши билан боғлиқ ҳолатни фош этди. Бу ҳақда вазирлик ахборот хизмати хабар берди.
Хабарга кўра, 4 март куни соат 10:00 ларда қўриқхонанинг асосий майдонига 3 нафар шахси номаълум фуқаро ноқонуний равишда киргани аниқланди. Ҳолат юзасидан қўриқхона бош мутахассиси, қўриқлаш ходимларидан иборат тезкор рейд гуруҳи тузилиб, қўриқхона ҳудудида кузатув ишлари олиб борилди.
Кузатув ишлари давомида қўриқхонага яқин ҳудудда ҳаракатланиб кетаётган Nexia-2 ходимларда шубҳа уйғотган. “Вандоб” маҳалласида яшовчи фуқаро Х.Б.га тегишли бўлган ушбу автомашина тўхтатилиб, юкхонаси кўздан кечирилганда бир бош бурама шохли эчки (морхўр)нинг гўшти бўлакланган ҳолда олиб кетилаётгани аниқланди.
Суриштирув ишлари давомида Шеробод туманининг “Вандоб” маҳалласида яшовчи фуқаро Ш.А. ва Ангор туманида яшовчи фуқаро I.Ў. қонунга хилоф равишда қўриқхонанинг Вандоб бўлими Дарайғулсой массивидан овчилик рухсатномаси бўлмаган ИЖ-17-32 калибрли бир стволли ов милтиғи ва 1 дона пневматик қурол билан Ўзбекистон Қизил китобига киритилган 1 бош морхўрни отиб нобуд қилгани маълум бўлди.
Аниқланган ҳолат бўйича “Сурхон” давлат қўриқхонаси, вилоят ИИБ, туман ИИБ ходимлари ва холис гувоҳлар иштирокида далолатнома расмийлаштирилди ҳамда ҳуқуқбузарларга тегишли бўлган ов қуроллари ва фуқаро Х.Б.га тегишли автомашина туман ИИБ ходимларига топширилди.
Шунингдек, ҳуқуқбузарлардан овланган морхўр гўшти ҳамда 8 дона отилмаган ва 4 дона ишлатилган – жами 11 дона ов милтиғи ўқлари қонуний тўхтамга келгунга қадар холис гувоҳлар иштирокида баённома расмийлаштирилиб, ашёвий далил сифатида олинди.
Ноқонуний овчиларнинг ёввойи ҳайвонот дунёсига келтирган зарари Вазирлар Маҳкамасининг 2014 йил 20 октябрдаги қарорининг 2-иловаси билан тасдиқланган низомнинг 14-иловасига асосан 180 000 000 сўмни ташкил этди.
Аниқланган ҳолат юзасидан бирламчи ҳужжатлар расмийлаштирилиб, Сурхондарё вилоят прокуратурасига тақдим этиш учун тайёрланмоқда.
Изоҳ (0)