Тошкент вилоятининг Пискент туманида МЧЖ раҳбари ва собиқ банк бошқарувчиси 9 млрд сўм кредитни ўзлаштиргани аниқланди. Бу ҳақда Бош прокуратура департаменти хабар қилди.
Маълум қилинишича, “Микрокредитбанк” АТБ Пискент филиалининг мурожаатига асосан департаментнинг Пискент туман бўлими томонидан терговга қадар текширув ўтказилган.
Текширув натижасида “Кҳ.С.” ва “А-Б.” МЧЖлар раҳбари Н.С. ва бошқалар ушбу банк филиали собиқ бошқарувчиси Р.М. билан ўзаро тил бириктириб, бошқа банк филиалида гаровга қўйилган мулкларни қалбаки ҳужжатлар асосида такроран гаровга қўйиш орқали тадбиркорлик ва чорвачилик фаолиятини ривожлантириш учун жами 9 млрд сўм кредит ажратилишига эришиб, мазкур маблағларни “П.” МЧЖга ўтказиш орқали нақдлаштириб олиб, талон-торож қилгани аниқланган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш), 205-моддаси (ҳокимият ёки мансаб ваколатини суиистеъмол қилиш) 28, 209-моддаси (мансаб сохтакорлиги) ва 233-моддаси (банд солинган мулкни қонунга хилоф равишда тасарруф этиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)