Navoiy viloyati Qiziltepa tumanida poyezd bosib ketgan 38 yoshli erkak voqea joyida halok bo‘ldi. Bu haqda Ichki ishlar vazirligi axborot xizmati xabar berdi.
Xabarga ko‘ra, 38 yoshli fuqaro poyezd yo‘lagidan o‘tayotgan paytda uni yuk poyezdi bosib ketgan. Erkak poyezdning ogohlantiruvchi signaliga ahamiyat bermagan. Poyezdning 51 ta vagoni borligi sababli to‘xtatishga ulgurmagan, ancha masofani bosib o‘tgach keyin to‘xtagan.
Voqea sodir bo‘lgan hududga mutaxassislar kelganida fuqaro vafot etgani maʼlum bo‘lgan. Hodisa yuzasidan ichki ishlar xodimlariga xabar berilgan.
Qiziltepa tumanida mazkur holat yuzasidan mahalla vakillari ishtirokida muhokama o‘tkazildi. Unda marhumning oilasida hech qanday kelishmovchiliklar va ruhiy holati bilan bog‘liq vaziyatlar yuz bermagani qayd etilgan. Shuningdek, uning oilasi notinch oilalar ro‘yxatida bo‘lmagani, er-xotin janjallashgani haqida biror marta xabar bo‘lmagani taʼkidlandi.
Maʼlum qilinishicha, hozirda holat yuzasidan tergovga qadar surishtiruv ishlari olib borilmoqda.
Avvalroq Toshkent tumanida 11-fevral kuni poyezd tagidan o‘tayotgan erkakning oyog‘i uzilib tushgani haqida xabar berilgandi.
Izoh (0)