Беларусь хавфсизлик кучлари мамлакатда оммавий тинтув ўтказмоқда. Сўнгги уч йил давомида маъмурий ва сиёсий моддалар билан таъқибга учраганларнинг барчаси гумон остида. Бу ҳақда “Вясна” инсон ҳуқуқлари маркази хабар берди.
Ҳуқуқ ҳимоячилари таъкидлашича, хавфсизлик кучларининг бундай оммавий рейдига Беларуснинг Macҳулиши аэродромида жойлашган А-50 Россия радар самолётининг ишдан чиқарилиши сабаб бўлган.
“Кеча ва бугун Минск вилоятида Давлат хавфсизлик қўмитаси (КГБ) ходимлари Macҳулишида ҳужумга учраган самолёт бўйича қидирув ва ҳибсга олиш ишларини олиб бормоқда. КГБ ходимлари 2020 йилдан 2023 йилгача маъмурий ва сиёсий моддалар бўйича жиноий жавобгарликка тортилганларнинг барчасини ҳибсга олмоқда”, — дейилади 5 март куни берилган хабарда.
Ҳуқуқ ҳимоячиларининг дастлабки маълумотларига кўра, камида 10 киши ҳибсга олингани маълум, тинтувлардан сўнг улар КГБ ҳибсхонасига жўнатилган.
Аввалроқ партизанлар Беларусда Россиянинг А-50 самолётига қилинган ҳужум видеосини намойиш қилганди. Унда дроннинг Macҳулиши аэродроми устидан бемалол учаётганини кўриш мумкин.
26 февраль куни Россиянинг А-50 радар ва бошқарувчи самолёти Macҳулишидаги аэродромда дронларнинг ҳужумидан шикастлангани ҳақида хабар берилганди. ОАВ хабарларига кўра, саботажда беларус партизанлари иштирок этган.
Изоҳ (0)