Belarusdagi harbiy aerodromda portlashlar yuz berdi. Rossiya samolyotiga zarar yetgani aytilmoqda
Minskdan 12 kilometr uzoqlikda joylashgan Machulishi posyolkasidagi Belarus harbiy aerodromida bir nechta portlashlar sodir bo‘ldi, deb xabar berdi BYPOL — Belarus huquq-tartibot organlarining sobiq xodimlari tomonidan tuzilgan muxolifat loyihasi. Dastlab faollar portlash oqibatida Rossiya harbiy-transport samolyoti va qor tozalash mashinalariga zarar yetganini yozishgan, shu bilan birga, portlash sabablariga aniqlik kiritilmagan.
Keyinchalik BYPOL harbiy aerodromda sabotaj sodir etilgani, oqibatda Rossiya harbiy havo desantlarining A-50 erta ogohlantirish va nazorat radariga ega samolyoti jiddiy zarar ko‘rgani haqida xabar berdi: “Samolyotning old va markaziy qismlariga zarar yetgan, avionika va radar antennasi shikastlangan”, — deyiladi loyiha bayonotida.
O‘z navbatida, BYPOL rahbari Aleksandr Azarov “Nasha Niva” nashriga Machulishi aerodromidagi qo‘poruvchilik harakatlarida Belarus partizanlari ishtirok etganini aytdi. Azarov “Belsat” nashriga bergan izohida hujum dronlar yordamida amalga oshirilgani va operatsiyaning barcha ishtirokchilari allaqachon Belarusdan tashqarida ekanini ma’lum qildi.
Aerodromdagi portlashlar haqidagi maʼlumotni jurnalist Anton Motolko va “Belarus za MKADom” Telegram kanali tasdiqladi. “Belaruski Gayun” Telegram kanali Rossiyaning A-50 samolyoti “tepadan noma’lum narsaning qulashi oqibatida biroz zarar ko‘rgan bo‘lishi mumkinligi” haqida xabar berdi. Rossiyalik harbiy muxbirlar Yuriy Kotenok va Semyon Pegovlar ham aerodromga uchuvchisiz uchoqlar hujum qilgan bo‘lishi mumkinligini yozgan.
Belarus va Rossiya Federatsiyasi rasmiylari voqea yuzasidan hozircha izoh bermagan. “Zerkalo” jurnalistlari Belarus Favqulodda vaziyatlar vazirligi va Mudofaa vazirligi bilan bog‘lanishdi. Favqulodda vaziyatlar vazirligi nashrga portlashlar haqida hech qanday ma’lumot olmaganini ma’lum qilgan bo‘lsa, Mudofaa vazirligi “hech qanday jiddiy narsa yuz bermaganini” ta’kidladi.
