Turkmanistonda bu yil turkman xalq shoiri Mahtumquli Farog‘iy tavalludining 300 yilligi nishonlanadi. Shu munosabat bilan Turkmaniston poytaxtining janubida, Kopetdog‘ tog‘larining bir qismi bo‘lgan tepalikda ming tonnadan ortiq bronzadan yasalgan yodgorlik o‘rnatildi.
Haykaltarosh Saragt Babayev tomonidan yaratilgan haykalning balandligi 60 metrni tashkil qiladi, deb “Daryo”ga ma’lum qildi Turkmaniston Madaniyat vazirligidagi manba.
Kompozitsiyaning atrofini yashil madaniyat va istirohat bog‘i kompleksi o‘rab turadi. Hozirda kompleks ustida Rossiyaning “Vozrojdeniye” kompaniyasi ishlamoqda.
Kompaniyaga rahbarlik qilayotgan Igor Bukato yaqinda “Xalq maslahati” (Xalq kengashi) rahbari Gurbanguli Berdimuhamedovga amalga oshirilgan ishlar haqida hisobot bergan. Berdimuhamedov innovatsion texnologiyalarni qo‘llashni, xususan, “zamonaviy yoritish moslamalari va lazer nurlari yordamida Farog‘iyning o‘lmas she’riyatidan namunalarni tepaliklarga tushirishni” taklif qilgan.
Mahtumquli merosi O‘zbekistonda ham e’zozlanadi. Toshkentning asosiy ko‘chalaridan biriga uning nomi berilgan, 2017-yilda uning barelyefi o‘rnatilgan. Yaqinda uning “Elinga baxsh ayla” kitobi o‘zbek tilida nashr etildi.
Tarixchilarning ta’kidlashicha, Mahtumquli bir vaqtlar Xiva va Buxoroda tahsil olgani, Alisher Navoiyni o‘ziga ustoz, deb hisoblagani haqida hujjatli dalillar mavjud.
Izoh (0)