Toshkent shahrida kvartira ijaraga berilishi to‘g‘risida yolg‘on ma’lumotlarni joylashtirib, fuqarolarni chuv tushirib yurgan shaxsga nisbatan jinoyat ishi qo‘zg‘atildi. Bu haqda IIV Kiberxavfsizlik markazi xabar berdi.
Qayd etilishicha, Samarqand viloyati Toyloq tumanida yashovchi M.M. huquq-tartibot organlariga murojaat qilgan. U o‘z arizasida Olx platformasidagi eʼlon orqali ijaraga xonadon olish maqsadida Sh.A. bilan o‘zaro kelishganini bildirgan.
Ushbu fuqaro o‘zini ijaraga uy topib beruvchi makler sifatida tanishtirib, Chilonzor tumanida joylashgan ko‘p qavatli uylardagi ikki xonali kvartirani ijaraga olib berishini yolg‘ondan vaʼda qilgan. U M.M.dan oldindan to‘lov tariqasida 4,36 million pulni aldov yo‘li bilan qo‘lga kiritib, g‘oyib bo‘lgan.
Olib borilgan tezkor-qidiruv tadbirlar davomida firibgarlik yo‘li bilan pullarni o‘zlashtirgan shaxs Toshkent shahri Mirzo Ulug‘bek tumanida yashovchi 37 yoshli Sh.A. ekani aniqlangan.
Sh.A. internet tarmog‘idagi turli eʼlon platformalarida soxta eʼlonlar joylashtirib, firibgarlik yo‘li bilan o‘zgalarning pulini o‘zlashtirib, o‘z ehtiyojlari uchun ishlatib yuborgani maʼlum bo‘lgan.
Holatlar bo‘yicha unga nisbatan Jinoyat kodeksining 168-moddasi (firibgarlik) 3-qismi “b” bandi bilan jinoyat ishi qo‘zg‘atilgan.
Izoh (0)