Buxoroda bitta xususiy korxonaga qarashli 3 ta gaz zapravka tabiiy gazdan noqonuniy foydalanish oqibatida davlat manfaatlariga jami 11,8 milliard so‘m zarar yetkazdi, deb xabar beradi O‘zA.
Qayd etilishicha, 10-fevral kuni “Hududgaz Buxoro” GTF hamda metrologiya xizmati mutaxassislari hamkorligida viloyatdagi ayrim AGQKSHlarda o‘rganishlar olib borilgan. O‘rganishlar davomida “Solixov Olimjon Fazliddinovich” xususiy korxonasiga qarashli 3 ta gaz-zapravkada tabiiy gazdan noqonuniy foydalanish oqibatida davlat manfaatlariga jami 11 milliard 847 million 744 ming so‘m zarar yetkazilgani aniqlangan.
Ma’lumotlarga ko‘ra, korxonaning birinchi AGQKSh filialida 2022-yilning 1-noyabr kunidan 2023-yil 10-fevral kuniga qadar bo‘lgan davrda 3,49 milliard so‘mlik, ikkinchi AGQKSh filialida 5,77 milliard so‘mlik hamda uchinchi filialida 2,58 milliard so‘mlik tabiiy gaz yashirin ravishda talon-toroj qilingan.
To‘plangan hujjatlarga ko‘ra, “Solixov Olimjon Fazliddinovich” xususiy korxonasi mansabdor shaxslarining harakatlarida juda ko‘p miqdorda o‘g‘rilik sodir etishda ifodalangan jinoyat alomatlari mavjudligi aniqlangan. Olib borilgan o‘rganishlar natijasida mazkur holat yuzasidan G‘ijduvon tumanidagi “Solixov Olimjon Fazliddinovich” xususiy korxonasi mansabdor shaxslariga nisbatan jinoyat ishi qo‘zg‘atilgan.
Izoh (0)