Farg‘onada salkam 8 kilogramm zargarlik buyumlarini Damas ichiga yashirib, O‘zbekiston hududiga olib kirmoqchi bo‘lgan fuqaro qo‘lga olindi. Bu haqda “Mening yurtim” telekanalining “Hudud” dasturida ma’lum qilindi.
Qayd etilishicha, DXX Chegara qo‘shinlari, Farg‘ona viloyati bojxona boshqarmasi, “Ravot” chegara-bojxona posti xodimlari tomonidan Tojikistondan O‘zbekiston hududiga harakatlangan Damas ko‘zdan kechirilgan. Tekshiruv davomida avtomashina salonining tom qismiga o‘rnatilgan quti ichida hamda old o‘rindiqlar ostida bojxona xodimining og‘zaki so‘rovida ma’lum qilinmagan va deklaratsiyada ko‘rsatilmagan zargarlik buyumlari borligi aniqlandi.
To‘rtta sellofan paket ichiga yashirilgan 7,89 kilogramm zargarlik buyumlarining umumiy qiymati 181,5 million so‘mni tashkil etadi.
Hozirda holat yuzasidan bojxona organlari tomonidan tergovga qadar tekshiruv harakatlari olib borilmoqda.
Avvalroq Namanganda davlat chegarasini chetlab o‘tib, mamlakatga noqonuniy olib kirilgan 10 mingdan ortiq zargarlik buyumlari to‘xtatib qolingandi.
Izoh (0)