Тошкент шаҳрида квартира ижарага берилиши тўғрисида ёлғон маълумотларни жойлаштириб, фуқароларни чув тушириб юрган шахсга нисбатан жиноят иши қўзғатилди. Бу ҳақда ИИВ Киберхавфсизлик маркази хабар берди.
Қайд этилишича, Самарқанд вилояти Тойлоқ туманида яшовчи М.М. ҳуқуқ-тартибот органларига мурожаат қилган. У ўз аризасида Олх платформасидаги эълон орқали ижарага хонадон олиш мақсадида Ш.А. билан ўзаро келишганини билдирган.
Ушбу фуқаро ўзини ижарага уй топиб берувчи маклер сифатида таништириб, Чилонзор туманида жойлашган кўп қаватли уйлардаги икки хонали квартирани ижарага олиб беришини ёлғондан ваъда қилган. У М.М.дан олдиндан тўлов тариқасида 4,36 миллион пулни алдов йўли билан қўлга киритиб, ғойиб бўлган.
Олиб борилган тезкор-қидирув тадбирлар давомида фирибгарлик йўли билан пулларни ўзлаштирган шахс Тошкент шаҳри Мирзо Улуғбек туманида яшовчи 37 ёшли Ш.А. экани аниқланган.
Ш.А. интернет тармоғидаги турли эълон платформаларида сохта эълонлар жойлаштириб, фирибгарлик йўли билан ўзгаларнинг пулини ўзлаштириб, ўз эҳтиёжлари учун ишлатиб юборгани маълум бўлган.
Ҳолатлар бўйича унга нисбатан Жиноят кодексининг 168-моддаси (фирибгарлик) 3-қисми “б” банди билан жиноят иши қўзғатилган.
Изоҳ (0)