“Alloh yo‘lida sadaqa qilishdan qo‘rqmaslik kerak” — Nuriddin Xoliqnazarov

Muftiy Nuriddin Xoliqnazarov sadaqa va xayr-ehson qilish masalasida fikr bildirdi. Bu haqda Musulmonlar idorasi axborot xizmati xabar berdi.

Qayd etilishicha, mo‘min banda Alloh yo‘lida sadaqa qilishdan hech ham qo‘rqmasligi kerak. Bunda faqat riyoga yo‘l qo‘ymaslik kerakligi ta’kidlangan.

“Albatta, Alloh yo‘lida sadaqa-ehson qilishda mol-dunyomiz kamayib qolmagan. Aksincha, Alloh buni bizga ko‘paytirib beradi. Alloh yo‘lida sadaqa qilishdan hech ham qo‘rqmaslik kerak. Faqatgina riyo bo‘lmaslik kerak. Xo‘jako‘rsinlik bo‘lmaslik kerak va uni, albatta, haqdoriga berish shart.

Sadaqani faqat boylar qiladi degani emas, kim qo‘lidan kelsa, xoh yarimta xurmo bo‘lsin, xoh shirin so‘z bo‘lsin, sadaqa qilishimiz kerak. Xayru sahovat qilsak, albatta, bu dunyoda ham, u dunyoda ham savobi bor. Hozir dunyosi ko‘p odamlarning juda ko‘pchiligi riyoga berildi. Dabdabali to‘ylar, isroflar qilamiz, ammo yaqin qo‘shnimizning holidan xabar olmaymiz. Bir jamiyatda yashar ekanmiz, kambag‘al, muhtojlarning boshidan silashimiz kerak”, — deydi muftiy.