Muftiy Nuriddin Xoliqnazarov bolalarning ta’lim-tarbiyasiga e’tibor berish masalasida fikr bildirdi. Bu haqda Musulmonlar idorasi axborot xizmati xabar berdi.
Qayd etilishicha, ilm olish mavzusi hozirda jamiyat uchun eng muhim masalaga aylanmoqda. Farzandlar tarbiyasi ham ustuvor hisoblanadi.
“Bugun eng ahamiyatli mavzuga aylanayotgan ilm, tarbiya ahamiyati haqida va bundagi ba’zi muammolar va muolajalari haqida suhbatlashamiz.
Tarbiya, ilm ahamiyati dinimizda eng birinchi o‘ringa qo‘yilgan, azizlar. Payg‘ambarimiz (s.a.v) Qur’oni karimdan birinchi tushgan oyat, Jabroil alayhissalom yer yuziga birinchi bo‘lib olib tushgan Allohning kalomi, Islom dinining tarixi boshlanishiga sababchi bo‘lgan birinchi kalom “O‘qi” degan nido edi”, — deydi muftiy.
Nuriddin Xoliqnazarovning ta’kidlashicha, farzandlarning ilm olishiga jiddiy e’tibor berish kerak. Ularni bilimli qilish ota-ona uchun farz hisoblanadi.
“Ilm — bu farz. Hozirgi kunda hammani o‘ylantirayotgan masala, xalqimiz orasida bilib-bilmay ishlatilayotgan atama bor: dunyoviy va diniy ilmlar. Shuning natijasida dunyoviy ilmlar o‘qish dinga aloqasi yo‘q, buning savobi yo‘q degan tasavvur shakllanib qolgan. Ba’zi birlar esa aksincha faqatgina o‘qish kerak, bundan esa savob yo‘q demoqda.
Aslida dinimizda ilm diniy va dunyoviyga ajratilmaydi, hammasi bir ilm hisoblanadi. Balki aksincha foydali va foydasiz ilmga ajratiladi. Barcha ilmlar insonning baxtu kamoli uchun xizmat qiladi”, — deb ta’kidladi diniy idora rahbari.
Izoh (0)