“Аллоҳ йўлида садақа қилишдан қўрқмаслик керак” — Нуриддин Холиқназаров

Муфтий Нуриддин Холиқназаров садақа ва хайр-эҳсон қилиш масаласида фикр билдирди. Бу ҳақда Мусулмонлар идораси ахборот хизмати хабар берди.

Қайд этилишича, мўмин банда Аллоҳ йўлида садақа қилишдан ҳеч ҳам қўрқмаслиги керак. Бунда фақат риёга йўл қўймаслик кераклиги таъкидланган.

“Албатта, Аллоҳ йўлида садақа-эҳсон қилишда мол-дунёмиз камайиб қолмаган. Аксинча, Аллоҳ буни бизга кўпайтириб беради. Аллоҳ йўлида садақа қилишдан ҳеч ҳам қўрқмаслик керак. Фақатгина риё бўлмаслик керак. Хўжакўрсинлик бўлмаслик керак ва уни, албатта, ҳақдорига бериш шарт.

Садақани фақат бойлар қилади дегани эмас, ким қўлидан келса, хоҳ яримта хурмо бўлсин, хоҳ ширин сўз бўлсин, садақа қилишимиз керак. Хайру саҳоват қилсак, албатта, бу дунёда ҳам, у дунёда ҳам савоби бор. Ҳозир дунёси кўп одамларнинг жуда кўпчилиги риёга берилди. Дабдабали тўйлар, исрофлар қиламиз, аммо яқин қўшнимизнинг ҳолидан хабар олмаймиз. Бир жамиятда яшар эканмиз, камбағал, муҳтожларнинг бошидан силашимиз керак”, — дейди муфтий.