Huquqni muhofaza qiluvchi organlar tomonidan Namangan, Toshkent va Sirdaryo viloyatlarida giyohvandlik vositalari savdosiga qarshi tezkor tadbirlar o‘tkazildi.
Xususan, DXXning Namangan viloyati bo‘yicha boshqarmasi xodimlari tomonidan viloyat ichki ishlar hamda bojxona boshqarmalari bilan hamkorlikda o‘tkazilgan tezkor tadbirda Samarqand—Namangan yo‘nalishida harakatlanayotgan Lacetti avtomashinasi Chust tumani hududida to‘xtatilib tekshirilgan.
Natijada unda yo‘lovchi sifatida ketayotgan, Samarqand shahrida yashovchi 54 va 31 yoshli ikki fuqaroning yonida 1,470 kilogramm gashish moddasi borligi aniqlanib, protsessual tartibda rasmiylashtirib olingan.
Aniqlanishicha, uchinchi shaxslar tomonidan Tojikistondan O‘zbekiston hududiga o‘tkazilgan ushbu narkotiklarni Namangan shahriga olib borib berishlari evaziga mazkur ikki fuqaroning har biriga 1 million so‘mdan pul berilishi va’da qilingan.
Boshqa bir holatda esa Namangan shahrida yashovchi 44 yoshli muqaddam giyohvand moddalar savdosi bilan bog‘liq jinoyat sodir etgani uchun sudlangan shaxs boshqaruvidagi Lada avtomashinasi viloyat markazida to‘xtatilib tekshirilgan. Tekshiruv davomida mashina salonida 931 gramm gashish moddasi borligi aniqlanib, tegishli tartibda rasmiylashtirib olingan.
Shuningdek, u qirg‘izistonlik narkokuryer tomonidan O‘zbekiston hududiga o‘tkazilgan mazkur giyohvandlik moddasini Yangiqo‘rg‘on tumanida istiqomat qiluvchi, muqaddam giyohvand moddalar savdosi bilan bog‘liq jinoyat sodir etgani uchun sudlangan shaxsdan (1974-yilda tug‘ilgan) olgani aniqlangan hamda u ham ushlangan.
Namangan shahridagi avtoturargohlardan birida 38 yoshli mahalliy fuqaro 1 568 dona “Regapen” kuchli ta’sir qiluvchi dori vositalarini 1600 dollarga sotayotgan vaqtida qo‘lga olingan.
DXX xodimlari tomonidan bojxona organlari xodimlari bilan hamkorlikda Toshkent shahrida ham bir nechta tezkor tadbirlar o‘tkazilgan. Xususan, Surxondaryo viloyatida yashovchi 32 va 30 yoshli ikki fuqaro 496 gramm gashish moddasini kelgusida sotish maqsadida Toshkent shahriga olib kelgan vaqtida Chilonzor tumanida ushlangan.
Yashnobod tumanida o‘tkazilgan tezkor tadbirda 31 yoshli fuqaro 1680 dona “Regapen” kuchli ta’sir qiluvchi dori vositalarini 30 million so‘mga, Bektemir tumanida qayd etilgan holatda esa muqaddam sudlangan shaxs 133 dona “Regapen” va 43 dona “Tropikamid” kuchli ta’sir qiluvchi dori vositalarini 12 million so‘mga sotayotgan vaqtida qo‘lga olingan.
Sirdaryo viloyatida o‘tkazilgan tezkor tadbirda esa Farg‘ona—Sirdaryo yo‘nalishida harakatlanib kelayotgan, Guliston shahrida yashovchi 31 yoshli shaxs boshqaruvidagi Gentra avtomashinasi “Sayxunobod” YPX maskanida to‘xtatilib tekshirilgan. Tekshiruv davomida 242 dona “Tropikamid” kuchli ta’sir qiluvchi dori vositasi hamda O‘zbekistonda muomalasi cheklangan narkotik moddalar turkumiga kiruvchi 78 dona “Tramadol” dori vositasi borligi aniqlanib, tegishli tartibda rasmiylashtirilib olindi.
Shuningdek, tezkor tadbir davom ettirilib, avtomashinada yo‘lovchi sifatida ketayotgan, muqaddam sudlangan 30 yoshli shaxsning Guliston shahridagi yashash manzilidan 406 dona “Regapen” va 56 dona “Tropikamid” kuchli ta’sir qiluvchi dori vositalari olindi.
Hozirda barcha holatlar yuzasidan jinoyat ishlari qo‘zg‘atilib, tergov harakatlari olib borilmoqda.
Avvalroq Bo‘stonliqdagi “Bochka”da psixotrop modda sotuvchi ikki kishi qo‘lga tushgani, DXX Toshkentda narkolaboratoriya tashkil qilgan ikki kishini ushlagani, Surxondaryoda kartoshka ichiga yashirib olib o‘tilayotgan 154 kg gashish to‘xtatib qolingani to‘g‘risida xabar berilgandi.