Davlat xavfsizlik xizmatining Buxoro viloyati bo‘yicha boshqarmasi tomonidan giyohvand moddalarning noqonuniy aylanmasiga qarshi kurashish doirasida o‘tkazilgan tezkor-qidiruv tadbirlari natijasida bir guruh og‘ufurushlar faoliyatiga chek qo‘yildi. Bu haqda DXX axborot xizmati xabar qildi.

Qayd etilishicha, narkotik moddalar savdosi bilan shug‘ullanib kelgan Qorako‘l tumanida yashovchi fuqaro (1983-yilda tug‘ilgan) ko‘p miqdordagi giyohvandlik vositasini sotmoqchi ekani to‘g‘risida ma’lumotlar olingan. Unga ko‘ra tezkor tadbir rejasi ishlab chiqilgan va narkosavdogar kuzatuvga olingan.

Qorako‘l tumani “Tayqir” MFY hududidan o‘tuvchi yo‘l yoqasida u 1 kilogramm 681 gramm opiy moddasini muqaddam sudlangan shaxsga (1959-yilda tug‘ilgan) 9 ming 100 dollarga sotgan vaqtida ularning har ikkisi ham qo‘lga olingan.

Shuningdek, dastlabki surishtiruv harakatlari davomida og‘ufurush kelgusida sotish maqsadida yashash xonadonining tomorqasiga 1 kg 68 gr opiy moddasini yashirib qo‘ygani ma’lum bo‘lgan. U ham xolislar ishtirokida protsessual tartibda rasmiylashtirib olingan.

Musodara etilgan giyohvandlik vositalari afg‘onistonlik narkokurerlar tomonidan keltirilgani to‘g‘risida ma’lumotlar olingan. Xizmat xodimlari hamda viloyat Bojxona va Ichki ishlar boshqarmalari xodimlari hamkorligida tezkor tadbirning ikkinchi bosqichi amalga oshirilgan.

Natijada Afg‘oniston fuqarosi (1971-yil Afg‘onistonning Balx viloyatida tug‘ilgan) 940 gramm opiy moddasini Buxoro shahriga olib kelib, 2 ming 500 dollarga sotgan vaqtida qo‘lga olingan.

Ushbu giyohvandlik vositasi boshqa afg‘on narkokuryerlari tomonidan bojxona nazoratidan yashirib, mamlakatimiz hududiga olib o‘tilgan. O‘tkazilgan tezkor tadbirlar natijasida jami 3 kg 689 gr opiy moddasi musodara qilingan.

Holat yuzasidan Davlat xavfsizlik xizmatining Buxoro viloyati bo‘yicha boshqarmasi Tergov bo‘limi tomonidan har uchala fuqaroga nisbatan Jinoyat kodeksining 273-moddasi 5-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.

Bundan tashqari, Davlat xavfsizlik xizmatining Andijon viloyati bo‘yicha boshqarmasi xodimlari tomonidan tezkor tadbir o‘tkazilgan. Unda Qorasuv shahrida yashovchi fuqaro (1993-yilda tug‘ilgan) qirg‘izistonlik narkokuryerlar tomonidan Andijon shahriga yetkazib berilgan 5 kg 311 gr gashish moddasini qabul qilib olgan vaqtida ushlangan.

Shuningdek, uning yashash manzilida 224 dona “Tropikamid” kuchli ta’sir qiluvchi dori vositalari borligi aniqlanib, tegishli tartibda rasmiylashtirib olingan.

Uning jinoiy sherigi bo‘lgan Qorasuv shahrida yashovchi shaxs (1994-yilda tug‘ilgan) ham qo‘lga olingan.

Hozirda Davlat xavfsizlik xizmatining Andijon viloyati bo‘yicha boshqarmasi Tergov bo‘limi tomonidan mazkur ikki fuqaroga nisbatan jinoyat ishi qo‘zg‘atilgan.