Самарқанд шаҳридаги тунги клубларининг бирида опий гиёҳвандлик моддасини сотишга уринган шахслар қўлга олинди. Бу ҳақда Самарқанд вилояти ИИБ ахборот хизмати хабар берди.
Олинган тезкор маълумотларга асосан, Самарқанд вилояти ИИБ Уюшган жиноятчиликка қарши кураш бўлими ходимлари, ДХХ вилоят бошқармаси ҳамда ҳарбий қисм чегара қўшинлари тезкор бўлинмаси ходимлари ҳамкорлигида Самарқанд шаҳридаги тунги клубларнинг бирида тезкор тадбир ўтказилган.
Тадбир давомида 36 ҳамда 33 ёшли Ургут тумани фуқаролари тадбирга жалб қилинган шахсга 10 минг доллар эвазига тахминан оғирлиги 810 грамм опий гиёҳвандлик моддасини сотаётган вақтида далилий ашёлар билан ушланган. Уларга тегишли бўлган автомашина кўздан кечирилганда 1 дона электрон тарози борлиги ҳам аниқланган ва тегишли тартибда ҳужжатлаштириб олинган.
Ҳолат бўйича Самарқанд вилоят ИИБ ҳузуридаги Тергов бўлими томонидан ушбу фуқароларга нисбатан жиноят иши қўзғатилиб, улар тегишли тартибда қамоққа олинган.
Аввалроқ ДХХ Бухорода гиёҳванд моддани 2,5 минг долларга сотишга уринган Афғонистон фуқаросини ушлагани, Тошкент шаҳри ва вилоятида кучли таъсир қилувчи дорилар савдоси билан шуғулланган 9 киши қўлга олингани, ДХХ Наманган, Тошкент ва Сирдарёда гиёҳвандлик моддалари савдосига чек қўйгани тўғрисида хабар берилганди.
Изоҳ (0)