Davlat xavfsizlik xizmati respublikaning qator viloyatlarida jami 56 kilogramm opiy va gashish giyohvandlik vositalarini musodara qildi.
Ma’lum qilinishicha, DXX Chegara qo‘shinlari va Sirdaryo viloyati bo‘yicha boshqarmasi harbiy xizmatchilari hamkorligida o‘tkazilgan tezkor-qidiruv tadbirlari natijasida Tojikistondan O‘zbekistonga kontrabanda yo‘li bilan o‘tkazilgan 4,8 kilogramm opiy hamda 42,89 kilogramm gashish moddalari to‘xtatib qolingan.
Tezkor surishtiruv harakatlari davomida aniqlanishicha, Marg‘ilon shahrida yashovchi, muqaddam giyohvandlik vositalari savdosi bilan bog‘liq jinoyati uchun sudlanib, jazo muddatini o‘tagan 37 yoshli shaxs Toshloq tumanida istiqomat qiluvchi, 1987-yilda tug‘ilgan tanishi bilan birga Beshariq tumanidagi chegara nazorat o‘tkazish punkti orqali Tojikistonning So‘g‘d viloyati Zafarobod tumaniga borgan.
U yerda mahalliy narkosavdogar bilan uchrashib, giyohvandlik moddalarini 10 ming dollar evaziga Sirdaryo viloyatining Xovos tumani hududiga o‘tkazib berishga kelishgan. Lekin kuryerlar narkotik moddalarni davlat chegarasidan o‘tkazgan vaqtida qo‘lga olingan.
Shuningdek, yashash xonadonida 7,33 kilogramm opiy moddasini kelgusida sotish maqsadida saqlab kelgan, Urgut tumanida istiqomat qiluvchi 31 yoshli fuqaroga nisbatan DXX Samarqand viloyati bo‘yicha boshqarmasi tomonidan jinoyat ishi qo‘zg‘atilgan. Ushbu ish doirasida uning ko‘rsatmasi asosida qarindoshining uyidan 6 kilogramm 403 gramm opiy moddasi qo‘shimcha ashyoviy dalil sifatida olingan. Mazkur narkotik moddalar ham Tojikistondan olib kelingan.
DXX Toshkent viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda Yuqori Chirchiq tumanida ham tezkor tadbir o‘tkazilgan. Tadbirda Andijon viloyatining Baliqchi tumanida yashovchi, 1963 va 1968-yillarda tug‘ilgan, muqaddam giyohvandlik vositalari savdosi bilan bog‘liq jinoyatlari uchun sudlanib, jazo muddatini o‘tagan 2 nafar fuqaro 1 kilogramm 399 gramm gashish moddasini 15 ming dollarga sotayotgan vaqtlarida ushlangan. Bu holatda narkotik modda Qirg‘izistondan olib kelingan.
DXX Andijon viloyati bo‘yicha boshqarmasi hamda viloyat IIB xodimlari hamkorligida o‘tkazilgan tezkor tadbirda esa Andijon shahrida yashovchi, muqaddam sudlangan 44, 39, 36 yoshli uch nafar shaxs qo‘lga olingan. Ularning yonlari va xonadonlari ko‘zdan kechirilganda Qirg‘izistondan keltirilgan jami 546 gramm gashish moddasi borligi aniqlanib, protsessual tartibda rasmiylashtirib olingan.
Hozirda barcha holatlar yuzasidan ushbu shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq DXX Buxoroda giyohvand moddani 2,5 ming dollarga sotishga uringan Afg‘oniston fuqarosini ushlagani, Toshkent shahri va viloyatida kuchli ta’sir qiluvchi dorilar savdosi bilan shug‘ullangan 9 kishi qo‘lga olingani, DXX Namangan, Toshkent va Sirdaryoda giyohvandlik moddalari savdosiga chek qo‘ygani to‘g‘risida xabar berilgandi.
Izoh (0)