Samarqand, Jizzax, Toshkent viloyatlarida jami 11,4 kilogramm opiy va gashish moddalari musodara qilindi, deb xabar bermoqda Davlat xavfsizlik xizmati.
Qayd etilishicha, DXXning Samarqand viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda tezkor tadbir o‘tkazilgan. Unda Jizzax viloyatining Baxmal tumanida yashovchi fuqaro (1983-yilda tug‘ilgan) Urgut tumaniga borib, tanishidan (1992-yilda tug‘ilgan) 1 kilogramm 916 gramm opiy moddasini olgani aniqlangan. So‘ng o‘zining boshqaruvida bo‘lgan Nexia-2 avtomashinasida doimiy yashash manziliga qaytib ketayotgan vaqtida Bulung‘ur tumanida ushlangan hamda undan giyohvandlik vositasi tegishli tartibda rasmiylashtirib olingan.
Shuningdek, tezkor tadbir davom ettirilib, unga ajal og‘usini bergan fuqaroning Urgut tumanidagi yashash xonadoni ko‘zdan kechirilgan. Natijada kelgusida sotish maqsadida saqlanayotgan 7 kilogramm 331 gramm opiy moddasi borligi aniqlanib, u ham protsessual tartibda rasmiylashtirilgan.
Bundan tashqari, DXX Navoiy va Jizzax viloyatlari bo‘yicha boshqarmalari xodimlari tomonidan bojxona hamda ichki ishlar organlari bilan hamkorlikda G‘allaorol tumanida ham tezkor tadbir o‘tkazilgan. Unda esa Samarqand viloyatining Urgut tumanida yashovchi fuqaro (1988-yilda tug‘ilgan) 469 gramm opiy moddasini 8 ming dollarga sotayotgan vaqtida ushlangan.
Ta’kidlanishicha, mazkur shaxs muqaddam giyohvand moddalar savdosi bilan bog‘liq jinoyati uchun sudlanib, jazo muddatini o‘tagan bo‘lsa-da, o‘z xatosidan to‘g‘ri xulosa chiqarmagan.
Tezkor surishtiruv harakatlari davomida u moddani Urgut tumanida yashovchi fuqarodan (1989-yilda tug‘ilgan) 5 ming dollarga sotib olgani aniqlanib, u ham qo‘lga olingan.
Toshkent viloyatida kuzatilgan holatda Namangan shahrida yashovchi ayol (1982-yilda tug‘ilgan) Bekobod shahrida hozirda shaxsiga aniqlik kiritilayotgan fuqarodan 1 kilogramm 696 gramm gashish moddasini Namangan viloyatiga yetkazib berish uchun olib, Ohangaron shahrida Farg‘ona vodiysiga qatnaydigan avtomashinalar turargohiga borayotgan vaqtida DXX Toshkent viloyati bo‘yicha boshqarmasi hamda viloyat bojxona boshqarmasi xodimlari tomonidan ushlangan.
Aniqlanishicha, narkotik moddani Namangan viloyatining Pop tumaniga olib borib, kerakli joyda qoldirib ketishi uchun ayolga 200 dollar berilgan.
Yuqoridagi barcha holatda giyohvandlik vositalari mamlakatga Tojikistondan kontrabanda yo‘li bilan olib kelingan.
Holat yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilgan. Hozirda tergov harakatlari olib borilmoqda.
Izoh (0)