Bukingem saroyi shahzoda Garri va uning rafiqasi Megan Marklni Buyuk Britaniyadagi qarorgohi Frogmordan chiqarib yubordi. Bu ma’lumotni BBC News’ga juftlikning vakili tasdiqladi.
O‘nta yotoqxonadan iborat Frogmor qarorgohi Berkshirdagi Vindzor qal’asi hududida joylashgan. Garri va Megan Marklga mulkdan foydalanish huquqi bir necha yil oldin Yelizaveta II tomonidan berilgan.
Bukingem saroyi er-xotinga qarorgohni tark etishi haqida yanvar oyida, shahzoda Garrining “Spare” nomli avtobiografiyasi nashr etilganidan bir necha kun o‘tgach bildirgan. O‘z memuarlarida Garri, boshqa narsalar qatori, oilasi bilan qanday arazlashib qolgani haqida gapirib beradi.
Sun tabloidiga ko‘ra, Frogmor mulkini hozirda yaqin atrofdagi Royal-Loj qarorgohida (uning 31 ta yotoqxonasi bor) yashovchi shahzoda Endryu egallashi mumkin. Britaniya ommaviy axborot vositalari qirol Charlz III shahzoda Endryu uchun yillik to‘lovlarni qisqartirish niyatida ekanini, shu sababli Endryu Royal-Lojda yashay olmasligini ta’kidlamoqda.
Bukingem saroyi bunga izoh bermadi.
Shahzoda Garri va Megan Markl 2020-yilda qirollik vakolatlaridan voz kechgan, shundan so‘ng ular Buyuk Britaniyani tark etgan. Juftlik hozir Kaliforniyada ikki farzandi bilan yashaydi.
Buyuk Britaniya qiroli Charlz III ning ukasi shahzoda Endryu 2019-yilda amerikalik Virjiniya Juffre uni jinsiy zo‘ravonlikda ayblaganidan so‘ng qirollik oilasi a’zosi maqomidan ayrilgandi. Juffre Endryuga qarshi da’vo qo‘zg‘atdi, 2022-yil fevral oyida tomonlar sudgacha kelishuvga erishdi.
Izoh (0)