Shimoliy Koreya yetakchisi Kim Chen In amaldorlarni qishloq xo‘jaligi sohasidagi ishlab chiqarishda “fundamental islohotlar” o‘tkazishga chaqirdi. Bunday buyruq oziq-ovqat taqchilligi bilan bog‘liq xavotirlar fonida berildi, deb yozmoqda The Guardian.
Kim Chen In bu yil uchun g‘alla yetishtirish ko‘rsatkichlarini bajarish ustuvor vazifa ekanini ta’kidlab, barqaror qishloq xo‘jaligi ishlab chiqarish muhimligini qayd etgan.
Xabarda Shimoliy Koreya qanday choralar ko‘rishiga aniqlik kiritilmagan, biroq Kim Chen In yaqin bir necha yil ichida o‘zgarishlar bo‘lishi kerakligini ta’kidlagan.
Shimoliy Koreya qishloq xo‘jaligining katta qismi kollektiv dehqonchilikni tashkil qiladi. Bunday fermer xo‘jaliklarida, odatda, birgalikda ishlab, hosil yetishtiradigan bir nechta kichik fermerlar ishlaydi.
Fevral oyi boshida Janubiy Koreyaning ikki Koreyani birlashtirish vazirligi Shimolda oziq-ovqat bilan bog‘liq vaziyat yomonlashganini ma’lum qilgandi. Vazirlikning taʼkidlashicha, KXDR hukumati qishloq xo‘jaligini rivojlantirish strategiyasi bo‘yicha maxsus yig‘ilish haqida kamdan-kam e’lon qiladi.
Shimoliy Koreya oziq-ovqat xavfsizligining to‘liq ko‘lami noma’lum, biroq 38 North loyihasining yanvar oyidagi hisobotida aytilishicha, oziq-ovqat xavfsizligi 1990-yillarda mamlakatni vayron qilgan ocharchilikdan keyingi eng yomon holatda.
Izoh (0)