AQSH hukumati o‘z ittifoqchilarini agar Pekin Moskvaga harbiy yordam bersa, Xitoyga qarshi sanksiyalar qo‘llashga tayyor ekani haqida xabardor qildi. Bu haqda Reuters to‘rt nafar amerikalik rasmiyga tayanib yozmoqda.
Manbalarning so‘zlariga ko‘ra, Qo‘shma Shtatlar Xitoyga nisbatan ehtimoliy cheklovlarni o‘z ittifoqchilari bilan muvofiqlashtirish uchun bir qator davlatlar, xususan, G7 a’zolaridan yordam so‘ramoqchi.
Aynan qanday cheklovlar ko‘rib chiqilayotgani hali noma’lum. Ittifoqchilar o‘rtasidagi muzokaralar dastlabki bosqichda.
Fevral oyida AQSH davlat kotibi Entoni Blinken Xitoy Rossiyaga noharbiy yordam ko‘rsatayotganini, biroq qurol yetkazib berish masalasini ham ko‘rib chiqayotganini aytgandi. O‘z navbatida, Xitoy Ukrainadagi urushga aynan Amerika qurol-yarog‘lari sabab bo‘layotganini aytib, AQSHni aybladi.
Germaniyaning Der Spiegel nashri rossiyalik harbiylar Xitoyning dron ishlab chiqaruvchi kompaniyasi bilan kamikadze dronlarini yetkazib berish bo‘yicha muzokaralar olib borayotgani haqida xabar berdi. Nashr maʼlumotlariga ko‘ra, 100 ta dronning birinchi partiyasi Rossiyaga 2023-yil aprelida yetkazilishi mumkin. Urushni o‘rganish bo‘yicha Amerika instituti ekspertlari Xitoy Belarus yordamida G‘arb sanksiyalarini chetlab o‘tishga umid qilayotganini xabar qildi.
24-fevralda, Rossiyaning Ukrainaga keng ko‘lamli bosqiniga bir yil to‘lgan kuni Xitoy hukumati Rossiya—Ukraina mojarosini hal qilish rejasini taqdim etdi. Reja 12 banddan iborat bo‘lib, “bir tomonlama sanksiyalarni bekor qilish” talabini ham o‘z ichiga oladi.
Izoh (0)