Молдова бош вазири Дорин Речан Россиянинг Молдовага бостириб кириши эҳтимолдан йироқ экани, чунки у икки фронтда кураша олмаслиги, қолаверса, бунинг учун ресурслари етмаслигини таъкидлади.
Речаннинг айтишича, Россия Молдовага ҳужум қила олмайди, чунки уларнинг ораси жуда узоқ, мамлакатларни Украина ажратиб туради.
“Россия эскалация учун етарли ресурсларга эга эмас. Бундан ташқари, Россия Федерацияси Молдовага ҳарбий йўл билан бора олмаслиги ҳам аниқ. Бошқа томондан, Молдова Днестрбўйида юзага келиши мумкин бўлган эскалациянинг олдини олиш учун етарли салоҳиятга эга. Днестрбўйи минтақаси эса биз каби тинчлик ва барқарорликка интилади”, — деди Молдова бош вазири.
Речаннинг таъкидлашича, Россия гибрид ва ахборот уруши олиб бормоқда, пропоганда, дезинформация ва урушни ёқловчи баъзи тўқима ғояларни тарғиб қилмоқда. Шу билан бирга, сиёсатчи Кремл муваффақиятга эриша олмаслигига ишончи комил эканини таъкидлади.
Молдова бош вазири мамлакат асосан Украинанинг ҳаво ҳужумидан мудофаа тизимлари билан ҳимояланганини эслатди.
Аввалроқ Украина президенти Владимир Зеленский Брюсселда бўлиб ўтган Европа Иттифоқи саммитида Россия Молдовани босиб олишни режалаштираётганини айтганди. Зеленский разведка қўлга киритган Россиянинг босиб олиш режаси ҳақида Молдова президенти Майя Сандуни огоҳлантирганини таъкидлаган.
Шундан сўнг Майя Санду Молдова президенти Россиянинг мамлакатда давлат тўнтаришини амалга ошириш режалари ҳақида гапирган. У Россия Беларусь, Сербия ва Черногория фуқароларини жалб қилган ҳолда Молдовадаги ҳукумат биноларига ҳужум қилишни ва ҳокимиятни ўзгартиришни режалаштираётганини айтган.
Бунгача Молдова разведкаси раҳбари Россия 2023 йил бошида мамлакатга қарши уруш бошлашни режалаштиргани, аммо сценарийни амалга ошириш Украинадаги вазиятнинг ривожланишига боғлиқлигини маълум қилганди. Россия ташқи ишлар вазири Сергей Лавров Ғарб давлатлари Молдовани “навбатдаги Украина” сифатида кўраётганини айтганди.
Изоҳ (0)