Букингем саройи шаҳзода Гарри ва унинг рафиқаси Меган Марклни Буюк Британиядаги қароргоҳи Фрогмордан чиқариб юборди. Бу маълумотни BBC News’га жуфтликнинг вакили тасдиқлади.
Ўнта ётоқхонадан иборат Фрогмор қароргоҳи Беркширдаги Виндзор қалъаси ҳудудида жойлашган. Гарри ва Меган Марклга мулкдан фойдаланиш ҳуқуқи бир неча йил олдин Елизавета II томонидан берилган.
Букингем саройи эр-хотинга қароргоҳни тарк этиши ҳақида январь ойида, шаҳзода Гаррининг “Sparе” номли автобиографияси нашр этилганидан бир неча кун ўтгач билдирган. Ўз мемуарларида Гарри, бошқа нарсалар қатори, оиласи билан қандай аразлашиб қолгани ҳақида гапириб беради.
Sun таблоидига кўра, Фрогмор мулкини ҳозирда яқин атрофдаги Роял-Лож қароргоҳида (унинг 31 та ётоқхонаси бор) яшовчи шаҳзода Эндрю эгаллаши мумкин. Британия оммавий ахборот воситалари қирол Чарльз III шаҳзода Эндрю учун йиллик тўловларни қисқартириш ниятида эканини, шу сабабли Эндрю Роял-Ложда яшай олмаслигини таъкидламоқда.
Букингем саройи бунга изоҳ бермади.
Шаҳзода Гарри ва Меган Маркл 2020 йилда қироллик ваколатларидан воз кечган, шундан сўнг улар Буюк Британияни тарк этган. Жуфтлик ҳозир Калифорнияда икки фарзанди билан яшайди.
Буюк Британия қироли Чарльз III нинг укаси шаҳзода Эндрю 2019 йилда америкалик Виржиния Жуффре уни жинсий зўравонликда айблаганидан сўнг қироллик оиласи аъзоси мақомидан айрилганди. Жуффре Эндрюга қарши даъво қўзғатди, 2022 йил февраль ойида томонлар судгача келишувга эришди.
Изоҳ (0)