Vyetnam Milliy assambleyasi (bir palatali parlament) Siyosiy byuro a’zosi, hukmron Vyetnam Kommunistik partiyasi Markaziy qo‘mitasi kotibiyatining doimiy a’zosi Vo Van Txiongni mamlakatning yangi prezidenti etib sayladi. Bu haqda VnExpress xabar bermoqda. Vyetnamda hokimiyatning oliy organi parlament bo‘lib, mamlakatda kommunistik partiya yetakchi rol o‘ynaydi.
Vo Van Txiong 2026-yilgacha mamlakat prezidenti lavozimida ishlaydi.
Siyosatchining mamlakat prezidentligiga nomzodi Vyetnam Kommunistik partiyasi Markaziy qo‘mitasi tomonidan 1-mart kuni bo‘lib o‘tgan navbatdan tashqari plenumda ma’qullangan. U o‘z xohishi bilan isteʼfoga chiqqan avvalgi davlat rahbari Nguyen Suan Fukning o‘rnini egalladi.
Nguyen Suan Fuk o‘z muddati tugashidan oldin iste’foga chiqqan birinchi Vyetnam prezidentiga aylandi. Yangi davlat rahbari saylanishidan oldin uning vazifalarini vaqtincha Vyetnam vitse-prezidenti Vo Txi An Suan bajargan.
Vo Van Txiong haqida
Vo Van Txiong 1970-yil 13-dekabrda Vyetnam janubidagi Vin Long provinsiyasi An Fuok kommunasida tug‘ilgan. 1992-yilda Xoshimin universitetining falsafa fakultetini tamomlagan va 1999-yilda shu universitetning Ijtimoiy-gumanitar fanlar universitetining falsafa magistri darajasini olgan.
O‘qishni tugatgandan so‘ng u siyosiy karyera qurishni boshladi. Vyetnam Kommunistik yoshlar ittifoqi va partiya tashkilotlarining mahalliy bo‘limlarida rahbar lavozimlarda ishlagan. 2007-yil iyun oyida Vo Van Txiong Milliy Assambleya a’zosi bo‘ldi. 2011-yilda u hukmron partiya Markaziy qo‘mitasi a’zosiga aylandi.
Izoh (0)