Avstraliyaning chakana savdo do‘konlarida o‘g‘riliklar soni rekord darajaga yetdi, deb xabar bermoqda Reuters hukumat statistikasiga tayanib.
Masalan, Avstraliyaning janubi-sharqidagi Yangi Janubiy Uels shtatida 2021—2022-yillar oralig‘ida o‘g‘riliklar soni 23,7 foizga oshgan. Bu davlat statistikasi yuritila boshlagan 1995-yildan beri eng tez o‘sishdir.
Avstraliyaning yana bir shtati Kvinslendda do‘konlardan mahsulot o‘g‘irlashning oylik eng yuqori darajasi qayd etildi, deya xabar bermoqda Reuters politsiya ma’lumotlariga tayanib.
Avstraliya aholisining uchdan bir qismi Yangi Janubiy Uelsda yashaydi. Kvinslend mamlakatdagi aholi soni bo‘yicha uchinchi shtat hisoblanadi.
2022-yilning may oyidan beri Avstraliyada ishsizlik darajasi asta-sekin o‘sib bormoqda, deb yozadi Reuters. Shu bilan birga, Avstraliyada inflyatsiya darajasi 8 foiz.
Yanvar oyida Avstraliyada ishsizlik darajasi 3,7 foizni tashkil etdi. 2022-yilning noyabr va dekabr oylarida bu ko‘rsatkich 3,5 foiz darajasida saqlanib qolgandi. Davlat statistika byurosi ishsizlikning o‘sishini mehnat bozoridagi mavsumiy tebranishlar bilan bog‘ladi.
Izoh (0)