Vashington Tehronning yadro quroli yaratishiga yoki boshqa tarzda yadroga ega bo‘lishiga hech qachon yo‘l qo‘ymaydi. Bu haqda AQSH Davlat departamenti vakili Ned Prays Atom energiyasi bo‘yicha xalqaro agentlik (MAGATE)ning Eronda yerosti atom zavodidan 83,7 foizgacha boyitilgan uran zarralari topilgani haqidagi hisobotiga munosabat bildirish davomida gapirdi.
“Prezident (Jo) Bayden Eron hech qachon yadro quroliga ega bo‘lmasligi haqida jiddiy va qatʼiy vaʼda bergan. Biz bunga hech qachon yo‘l qo‘ymaymiz”, — dedi diplomat.
Prays Eronning yadro dasturini barqaror hal qilishda avvalo diplomatiyadan foydalanilishini yana bir bor ta’kidladi.
“Biz Eron yadro dasturi tufayli yuzaga kelgan muammoga barqaror yechim topishga intilyapmiz. Bunga erishishning eng samarali usuli diplomatiya ekaniga ishonishda davom etamiz. Ammo Eron hech qachon yadro quroliga ega bo‘lmasligi uchun biz barcha zarur vositalarni ishga solishimiz aniq”, — dedi Prays.
Davlat departamenti vakilining aytishicha, AQSH Yevropa va Yaqin Sharqdagi ittifoqchilari bilan yaqin aloqada.
Avvalroq AQSH Mudofaa vazirligi Eron “taxminan 12 kun ichida” yadroviy bomba ishlab chiqarishi mumkinligini ma’lum qilgandi.
19-fevral kuni xalqaro kuzatuvchilar Eron uranni yadroviy qurol yaratish uchun zarur bo‘lgan darajadan biroz past darajada boyitganini aniqladi. Hozir MAGATE xodimlari eronlik mutaxassislar 84 foiz soflikdagi boyitilgan uranni qanday qilib to‘plashga muvaffaq bo‘lganini aniqlashga harakat qilmoqda. Bu yadroviy qurolni yaratish uchun zarur bo‘lgan darajadan 6 foiz past. O‘z navbatida, Eron tomoni uranni boyitish darajasi 84 foizga yetkazilganini rad etdi.
27-fevral kuni AQSH Markaziy razvedka boshqarmasi direktori Uilyam Berns Ukrainadagi urush uchun qurol berish evaziga Moskva Eronga raketa dasturini ishlab chiqishda yordam berayotganini bildirdi.
Yadroviy kelishuv 2015-yilda Eron va BMT Xavfsizlik kengashining doimiy a’zolari (AQSH, Rossiya, Xitoy, Buyuk Britaniya va Fransiya), shuningdek, Germaniya o‘rtasida imzolangan. Kelishuvlar Tehronga uranni 3,67 foizgacha boyitish va maksimal 300 kg uran ishlab chiqarish imkonini beradi. AQSH bir tomonlama ravishda yadroviy bitimdan chiqqanidan so‘ng, Eron ham yadroviy kelishuv bo‘yicha o‘z majburiyatlarini to‘xtatdi.
Izoh (0)