AQSH Geologiya xizmati zilzilaga moyil 7 ta davlatni ma’lum qildi

Turkiya va Suriyadagi halokatli zilzilalardan qariyb bir hafta o‘tib, AQSH Geologiya xizmati eng ko'p zilzila sodir bo'ladigan 7 davlatni e’lon qildi.

Ma’lum qilinishicha Fiji, Tonga, Indoneziya, Yaponiya, Xitoy, Eron va Turkiya zilzila sodir bo‘lishi mumkin bo‘lgan davlatlar deb topilgan. Bu mamlakatlarda har qanday vaziyatda zilzilalar sodir bo‘lishi ehtimoli yuqori, ular seysmik faol zonada joylashgan.

Afg‘oniston nashriga ko‘ra, Tojikiston, O‘zbekiston, Pokiston va Hindistonda zilzila sodir bo‘lishi avvalroq prognoz qilingan bo‘lsa-da, AQSH Geologiya xizmati hisobotida bu davlatlar haqida hech narsa aytilmagan.

Turkiya va Suriyadagi zilzila

6-fevral kuni Turkiya janubi-sharqida 7 balldan yuqori bo‘lgan ikkita zilzila sodir bo‘ldi. Keyin o‘nlab aftershoklar qayd etildi. O‘sha kuni Suriyada ham zilzila yuz berdi. Turkiyadagi zilzila qurbonlari soni 31 643 nafarga yetdi, jarohatlanganlar soni esa 158 165 nafarni tashkil qilmoqda. Turkiya va Suriyada zilzila qurbonlar soni 33 mingdan oshdi, qutqaruv ishlari davom etmoqda.