Qashqadaryo va Jizzax viloyatida elektrdan noqonuniy foydalangan tadbirkorlar davlatga qariyb 250 million so‘m ziyon yetkazdi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Zarbdor tuman bo‘limi tomonidan tuman ETK xodimlari bilan hamkorlikda o‘tkazilgan tergovga qadar tekshiruvda, fuqaro O‘.X. “Nurafshon” MFYdagi tadbirkor X.A.ga tegishli donni maydalash xizmatlari binosini hech qanday hujjasiz umumiy foydalanishdagi elektr tarmog‘iga ulab, jami 150,8 million so‘mlik elektr energiyasidan noqonuniy foydalangani aniqlangan.
Shu kabi, departamentning Ko‘kdala tuman bo‘limi tomonidan o‘tkazilgan tergovga qadar tekshiruvda, “M.M.” oilaviy korxonasi rahbari Z.N. paxta titish va omuxta yem ishlab chiqarish sexini o‘zboshimchalik bilan elektr tarmog‘iga ulab, jami 97,3 million so‘mlik elektr energiyasidan noqonuniy foydalangani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)